संस्कृतिको संरक्षण गर्दै समृद्धितर्फ वर्तमान पुस्ता क्रियाशील रहनुपर्छ: पूर्वप्रधानमन्त्री खनाल

काठमाडौँ। पूर्वप्रधानमन्त्री एवम् नेपाली कम्युनिस्ट पार्टीका वरिष्ठ नेता झलनाथ खनालले देशमा मनाइने विविध चाडपर्व, भाषा, वेशभूषा, संस्कृतिको संरक्षण गर्दै समृद्धितर्फको यात्रालाई अघि बढाउनु वर्तमान पुस्ताको दायित्व भएको बताउनुभएको छ ।

उहाँले फागुपूर्णिमा (होली) पर्वका अवसरमा एक शुभकामना सन्देश जारी गर्दै जातीय तथा धार्मिक–सांस्कृतिक विविधताको अनुपम सङ्गमका रूपमा रहेको हाम्रो मुलुकमा पर्वले सबै नेपालीलाई खुसी साटासाट गर्न तथा सामाजिक सम्बन्ध अझ प्रगाढ बनाउन महत्त्वपूर्ण भूमिका निर्वाह गरेको बताउनुभयो ।

स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइहरूमा सुख, शान्ति, उत्तरोत्तर प्रगति र समृद्धिको कामना गर्दै नेता खनालले हर्षोल्लासपूर्वक रङ्गहरूमा रमाएर मनाइने नेपालीहरूको महान् पर्व फागुपूर्णिमाले आपसी सद्भाव, बन्धुत्व र राष्ट्रिय एकताको भावना सुदृढ बनाउने विश्वास व्यक्त गर्नुभयो ।

नेपालमा १२३ भाषाभाषी समुदाय र १० वटा धार्मिक आस्था तथा विश्वासका मानिसहरू बसोबास गर्ने उल्लेख गर्दै उहाँले यति धेरै विविधताबीच सामाजिक सहिष्णुता, पारस्परिक सम्मान र सहअस्तित्व कायम राख्नु हाम्रो साझा जिम्मेवारी भएको बताउनुभयो ।

पूर्वप्रधानमन्त्री खनालले बहुविविध समाजमा फागुपूर्णिमाजस्ता चाडपर्वले सबैलाई एकै सूत्रमा बाँध्दै राष्ट्रिय एकता सुदृढ गर्ने अवसर प्रदान गर्ने उल्लेख गर्नुभयो ।