नेपालगन्जमा छठको बढ्दो रौनक, अस्ताउँदो सूर्यलाई अर्घ्य दिइयो 

नेपालगञ्ज । छठ पर्वको मुख्य दिन नेपालगन्जको बागेश्वरी मन्दिर परिसरस्थित तलाउमा आज साँझ अस्ताउँदो सूर्यलाई अर्घ्य दिइएको छ । 

ठुलो सङ्ख्यामा उपस्थित व्रतालुहरूले अस्ताउँदो सूर्यलाई अर्घ्य दिएका हुन् । सूर्यको उपासना गर्दै मनाइने आस्थाको पवित्र पर्व छठ मनाउन बागेश्वरी मन्दिर परिसर भित्रको तलाउलाई यस वर्ष पनि ‘छठीघाट’ का रूपमा झकिझकाउ बनाइएको छ ।

हरेक वर्ष पूजा गर्नेको सङ्ख्या बढ्दै जाँदा नेपालगञ्जमा छठ पर्वको रौनक बढ्दै गएको छ । छठ पर्वमा पूजा गर्नेहरू बढ्दा केही वर्षयता बागेश्वरी मन्दिर परिसरमा रहेको तलाउमा भक्तजनको भीड लाग्ने गर्दछ । तलाउ क्षेत्रमा यस वर्ष पनि टेण्ट सजावट, विजुली बत्तीको सजावट, बाजागाजा, सांस्कृतिक भजन मञ्चको व्यवस्थापन, घाटको सरसफाइ गरिएको छ । भोलि मङ्गलवार बिहान उदाउँदो सूर्यलाई अर्घ्य दिएपछि छठ समापन हुन्छ ।

पहिला पूर्वी तराईका बासिन्दाले धूमधामले मनाउने छठको रौनक पश्चिममा पनि बढेको छ । चार दिनसम्म मुख्य विधि गरी मनाइने छठ पर्वको पहिलो दिन व्रतालुहरूले नुहाएर चोखो एवं अरबा अरबाइन खाने, दोस्रो दिन प्रसादको रूपमा खिर ग्रहण गरी खरना गर्ने, तेस्रो दिन अस्ताउँदो सूर्य र चौथो दिन बिहान उदाउँदो सूर्यलाई अर्घ्य दिएपछि छठ समापन हुने गर्दछ ।