एकल महिलाको हितमा योजनाबद्ध काम गर्दै ललितपुर महानगर

ललितपुर । आज १५ औ एकल महिला दिवस नेपालमा पनि विभिन्न कार्यक्रम गरी मनाइएको छ । मानव अधिकारका लागि महिला एकल महिला समूहले आज ललितपुरमा एक समारोहको आयोजना गरी यो दिवस मनाएको हो 

समारोहमा ललितपुर महानगरपालिकाका प्रमुख चिरीबाबु महर्जनले एकल महिलाको हितमा ध्यान दिएरै योजनाबद्ध रुपमा काम गरेको बताउनुभएको छ ।  महानगर प्रमुख महर्जनले एकल महिलाले धेरै पीडा भोग्नुपरेको कुराका विषयमा आफू जानकार  रहेको उल्लेख गर्दै आफ्नो पहिलो कार्यकालदेखि नै सहकार्य गरेर काम गर्दै आएको बताउनुभयो ।

“कोरियाको चेओरवन शहरसँग भगिनी सम्बन्ध कायम गर्‍यौँ, कोरियाको कृषिको राम्रो काम हामीले भित्र्याउन प्रयास गरियो, त्यसको सुरुआत सुनाकोठीको छहारी एकल महिला समूहलाई सहयोग गरेर काम गरिरहेका छौँ, महानगरभित्रका हरेक एकल महिला समूहसँग राम्रोसँग सहकार्य गरेर काम गरिरहेका छौँ, भविष्यमा पनि गर्छौं”, उहाँले भन्नुभयो । 

महानगर प्रमुख महर्जनले ललितपुरले सामाजिक क्षेत्रमा राम्रो काम गरिरहेको छ भन्दै त्यसमा एकल महिलाको हितका लागि गरिएको काम पनि महत्वपूर्ण कार्यका रुपमा रहेको बताउनुभयो ।

युएन वुमनका राष्ट्रिय प्रतिनिधि प्याट्रिसिया फर्नान्डेनले एकल महिलाको न्यूनतम आवश्यकता परिपूर्ति, स्वाभिमानको प्रत्याभूतिहरूका लागि ध्यान दिनुपर्ने र उनीहरूको क्षमता अभिवृद्धिका लागि निरन्तर सहयोग गर्नुपर्नेमा उहाँले जोड दिनुभयो । उहाँले सक्षम बन्न र आर्थिक सशक्तीकरणका लागि एकल महिलाको सङ्घर्ष अझै बाँकी रहेको धारणा राख्नुभयो ।

ललितपुर महानगर वडा नं २७ का अध्यक्ष कृष्णहरि महर्जनले एकल महिलाहरूलाई सशक्त र सक्रिय बनाउन वडा तहबाट धेरै कार्यक्रम उपलब्ध गराउँदै हौसला बनाउने तथा उनीहरूको क्षमता अभिवृद्धि गर्ने कार्य गरिरहेको जानकारी गराउनुभयो ।

सभा नेपालका अध्यक्ष उषा डङ्गोलले एकल महिलाहरूको अहिले पनि आर्थिक र मानसिक पीडा अझै चुनौतीपूर्ण रहेको बताउनुभयो । मानवअधिकारका लागि महिला एकल महिला सामूहिक अध्यक्ष कविता पाँडेले एकल महिलाका पीडा र समस्यालाई हेर्ने सोच राम्रो हुनुपर्ने बताउनुभयो ।

‘जीवन निर्माण र मर्यादा पुनर्स्थापित गर्न एकल महिलाहरूलाई सशक्त बनाऔँ’ भन्ने नारासहित १५औँ अन्तर्राष्ट्रिय एकल महिला दिवस मनाइएको हो ।

सन् २०१० मा संयुक्त राष्ट्रसङ्घद्वारा जुन २३ को दिनलाई अन्तर्राष्ट्रिय एकल महिला दिवसका रुपमा पारित गरेको थियो । सोही अनुसार सन् २०११ देखि एकल महिलाका क्षेत्रमा कार्य गर्ने विभिन्न मुलुकका सङ्घ संस्थाहरूले समेत अन्तर्राष्ट्रिय एकल महिला दिवस मनाउँदै आइरहेका छन् । नेपालमा पनि मानव अधिकारका लागि महिला, एकल महिला समूहले विभिन्न वकालतमुखी कार्यक्रम सञ्चालन गर्दै आएको छ ।

राष्ट्रिय तथा अन्तरराष्ट्रिस्तरबाट नै एकल महिलामाथि हुने विभेद र असमानताको अन्त्य हुनुपर्दछ भनिए तापनि लैङ्गिक विभेद, सामाजिक सांस्कृतिक संरचनाका कारणले एकल महिलाले सम्पत्तिमाथिको अधिकार प्राप्तिमा कठिनाइलगायत अन्य विभेद तथा दुर्व्यवहार लामो समयदेखि नै भोग्दै आएका छन् ।