नाग्म-गमगढी सडक विस्तारमा उदासीनता, बजेट फ्रिज,यात्रुलाई सास्ती

मुगु। कालीकोटको नाग्मदेखि मुगुको गमगढीसम्मको ९६ किलोमिटर सडक स्तरोन्नतिको कार्य सरकारको उदासीनताका कारण ढिलो भइरहेको छ। हरेक वर्ष बजेट छुट्याए पनि कामको गति अत्यन्त सुस्त छ, जसका कारण यात्रुहरूलाई ठूलो सास्ती भोग्नुपरेको छ।

“कर्णाली राजमार्गको खराब अवस्थामा गाडीभन्दा महँगो भए पनि हवाई मार्ग रोज्न बाध्यता बनाएको छ,” एक यात्रुले गुनासो गर्दै भने। कर्णालीका बासिन्दाहरूको लागि गाडीको महँगो भाडा जस्तो भए पनि हवाई यात्रा मात्र विकल्प बनेको छ।

हालका वर्षहरूमा निर्माण कम्पनीहरूले विभिन्न कारण देखाउँदै छुट्याइएका बजेट खर्च गर्न सकेका छैनन्। परिणामस्वरूप, बजेट फ्रिजमा जान्छ र टेण्डर प्रक्रिया अगाडि बढाउन ढिलाइ भइरहेको छ। चालू आर्थिक वर्ष २०८१/८२ का लागि १५ करोड रुपैयाँ बजेट छुट्याएपनि, सम्बन्धित निर्माण कम्पनीहरूले दायित्व भुक्तानीका लागि सरकारले बजेट उपलब्ध नगराएकाले टेण्डर प्रक्रिया अघि बढ्न सकेको छैन।

सडक डिभिजन कार्यालय जुम्लाका सूचना अधिकारी सुरेन्द्र चौधरीका अनुसार, “नयाँ टेण्डरका लागि बजेटको माग गरिएको छ, तर अहिलेसम्म बजेट प्राप्त भएको छैन। सरकारको प्राथमिकतामा परेका भए यो सडक पहिले नै कालो पत्रे भएको हुन्थ्यो।”

यो सडक निर्माणका लागि खड्का कृष्ण गालावा क्याराभान जेभी, शंकरमाली निर्माण सेवा र विकास श्रेया जेभी जस्ता निर्माण कम्पनीहरूले जिम्मा पाएका थिए, तर ठेकेदारहरूको लापरवाही र न्यून बजेटको कारण काम ढिलो भइरहेको छ।

यात्रुहरूको सहज यात्रा सुनिश्चित गर्न सरकार र निर्माण कम्पनीहरूको जिम्मेवारीप्रतिको उदासीनता क्षेत्रको समग्र विकासमा ठूलो अवरोध बनेको छ। सडक विस्तार र स्तरोन्नतिको गति तीव्र बनाउन, बजेट व्यवस्थापन सुधार गर्दै सरकारी स्तरमा कडा अनुगमनको आवश्यकता रहेको छ।