सङ्घीयताको प्रभावकारी कार्यान्वयन अहिलेको प्रमुख कार्यभार : मुख्यमन्त्री शाह

धनगढी । सुदूरपश्चिम प्रदेशका मुख्यमन्त्री कमल बहादुर शाहले सङ्घीयताको संस्थागत विकास (प्रभावकारी कार्यान्वयन) अहिलेको प्रमुख कार्यभार भएको बताउनुभएको छ ।

 उहाँले प्रदेश सरकार र स्थानीय तहका बिचको साझेदारी सङ्घीयताको आवश्यकता भएको बताउनुभयो । 

धनगढीमा आज स्थानीय तह सञ्चालन र नेतृत्व विकास सम्बन्धी अन्तरक्रिया कार्यक्रमको उद्घाटन गर्नुहुँदै मुख्यमन्त्री शाहले साझा अधिकार कार्यान्वयनका सवालमा केही समस्या देखिए पनि त्यसको समाधानका लागि प्रदेश सरकार प्रयत्नशील रहेको बताउनुभयो । 

उहाँले समुन्नत, समृद्ध प्रदेश निर्माणको अभियानमा प्रदेश सरकार र स्थानीय तह मिलेर अघि बढ्नु पर्नेमा जोड दिनुभयो । मुख्यमन्त्री शाहले स्थानीय तह सेवा सञ्चालन सम्बन्धी विधेयक प्रदेशसभा टेबुल भएको जानकारी दिनुभयो । माथिल्लो निकायबाट गरिने परिपत्रले कर्मचारी हतोत्साही भएर काम गर्न अनिच्छुक देखिएको उल्लेख गर्नुहुँदै उहाँले विकासमा अवरोध पुग्ने गरि कोही कसैले काम गर्न नहुने बताउनुभयो । 

कार्यक्रममा अख्तियार दुरुपयोग अनुसन्धान आयोगका आयुक्त जयबहादुर चन्दले विकास निर्माण, शिक्षा, बन लगायतका क्षेत्रमा भ्रष्ट्राचार बढेको बताउनुभयो । उहाँले भ्रष्ट्राचार नियन्त्रण कार्यलाई प्राथमिकता दिएर काम कारबाही गरिनुपर्ने बताउनुभयो ।

नेपाल नगरपालिका संघ सुदूरपश्चिम प्रदेश संयोजक वीरेन्द्र भट्टको अध्यक्षतामा भएको कार्यक्रममा प्रमुख सचिव डा.हरि लम्साल, महालेखा नियन्त्रक कार्यालयका उपमहानिर्देशक पदमराज पौडेल, नगरपालिका संघका अध्यक्ष भिम ढुङ्गाना लगायतले धारणा राख्नुभएको थियो । 

मुख्यमन्त्री तथा मन्त्रिपरिषद् कार्यालय, सुदूरपश्चिम प्रदेश अनुसन्धान तथा प्रशिक्षण कार्यालयद्वारा आयोजित कार्यक्रममा स्थानीय तहका प्रमुखहरूको सहभागिता रहेको छ । 

दुई दिनसम्म चल्ने कार्यक्रमको सहजिकरण पूर्व सचिवद्वय सोमनाथ सुवेदी र काशीराज दाहालले गर्नुहुने छ ।