झापामा न्वारनको भोज खाएका २७ जना बिरामी

झापा । झापाको मेचीनगर नगरपालिका– ९ माथिल्लो मागुरमाडीको एक घरमा न्वारनको भोज खाएका २७ जना बिरामी परेका छन् ।

हिजो स्थानीय गोविन्द श्रेष्ठको घरमा न्वारनको भोज खाएका अधिकांश स्थानीय बिरामी परेका हुन् ।

श्रेष्ठको नातिको न्वारनमा भोज खान गएका अधिकांश स्थानीयको स्वास्थ्यमा समस्या देखिएपछि अस्पताल भर्ना गरिएको मेचीनगर–९ का वडाध्यक्ष कञ्चनकुमार तामाङले जानकारी दिनुभयो ।

बिरामीको स्थानीय मेची आम्दा अस्पतालमा उपचार भइरहेको छ । भोजमा रहेको परिकारमा अखाद्य पदार्थ मिसावट हुँदा स्थानीय बिरामी भएको हुनसक्ने अस्पतालले जनाएको छ ।

स्थानीयमा बान्ता हुने, ज्वरो आउने तथा पखाला चल्ने समस्या देखिएको नगरपालिकाको नगर स्वास्थ्य शाखा प्रमुख सविता सापकोटाले जानकारी दिनुभयो ।