‘डिसइन्फर्मेसनबाट समाजलाई जोगाउन अति आवश्यक’

नेपालगन्ज । उच्च अदालत तुलसीपुर नेपालगन्ज इजलासका वरिष्ठतम् न्यायाधीश वामदेव ज्ञवालीले डिसइन्फर्मेसनबाट समाजलाई जोगाउन अति आवश्यक देखिएको बताउनुभएको छ । नेपाल पत्रकार महासङ्घ बाँकेको आयोजना तथा उच्च अदालत बार नेपालगन्ज र बाँके जिल्ला अदालत बार एसोसिएसनको सहकार्यमा आज नेपालगन्जमा आयोजना गरिएको ‘कानून र पत्रकारिता : अभिमुखीकरण कार्यक्रम’ को उद्घाटन गर्दै न्यायाधीश ज्ञवालीले डिसइन्फर्मेसन र मिसइन्फर्मेसनले समाजलाई दिग्भ्रमित गर्ने भएकोले पत्रकारहरूले सजग भएर समाचार सम्प्रेषण गर्नुपर्नेमा जोड दिनुभयो ।

उहाँले अदालत सम्बन्धि सही सूचना सम्प्रेषण गर्नु पत्रकारहरूको धर्म रहेको बताउनुभयो । सही सूचना सम्प्रेषण नहुँदा त्यसले जनतामा भ्रम पैदा गर्ने ज्ञवालीको भनाई छ । सही सूचनाले मात्र जनतालाई सुसूचित गर्ने अधिकार स्थापित गर्ने उहाँले बताउनुभयो । उहाँले अहिले तथ्यगत सूचना भन्दा पनि मिसइन्फर्मेसन र डिसइन्फर्मेसन चुनौती बनेको बताउनुभयो । ज्ञवालीले अदालतसँग जोडिएका सवालमा तथ्यगत समाचार सम्प्रेषण गर्न आग्रह गर्नुभयो । ज्ञवालीले अदालती टर्मिनोलोजी केही फरक हुने भएकाले पत्रकारले त्यसबारेमा ज्ञान राख्नुपर्ने बताउनुभयो  ।

नेपाल पत्रकार महासङ्घ लुम्बिनी प्रदेशका अध्यक्ष शुक्र ऋषि चौलागाईले पत्रकारलाई अदालती रिपोर्टिङबारे ज्ञान हुन जरुरी रहेको बताउनुभयो । उहाँले अदालती ज्ञान नहुँदा जनतामाझ फरक सूचना जाने गरेको तथ्य प्रस्तुत गर्नुभयो । विधागत पत्रकारिताका लागि यस्ता अभिमुखीकरण महत्त्वपूर्ण रहेको उहाँको भनाई छ । पत्रकारका लागि कानुनी ज्ञान अत्यन्तै जरुरी रहेको पनि उहाँले औँल्याउनुभयो । 

नेपाल पत्रकार महासङ्घ बाँकेका अध्यक्ष नवीन गिरीले कानुनको बारेमा पत्रकारहरूको क्षमता बढाउन अभिमुखीकरण गरिएको बताउनुभयो । उहाँले यो कार्यक्रमले कानुनी रिपोर्टिङमा पत्रकारलाई थप ज्ञान हासिल हुने विश्वास व्यक्त गर्नुभयो । उच्च अदालत बार नेपालगन्जका अध्यक्ष चित्र बहादुर शाहीले अभिमुखीकरण कार्यक्रमले कानुनी रिपोर्टिङमा पत्रकारहरूलाई सहज हुने विश्वास ब्यक्त गर्नुभयो । 

कार्यक्रममा वरिष्ठ अधिवक्ता लोक बहादुर शाहले सञ्चारसँग सम्बन्धित प्रचलित कानुनहरू, अधिवक्ता प्रह्लाद बहादुर कार्कीले पत्रकारिता र कानुनी आधारभूत ज्ञान तथा अदालती रिपोर्टिङका बारेमा अधिवक्ता विकास आचार्य सहजीकरण गर्नुभएको थियो । 

कार्यक्रममा नेपाल पत्रकार महासङ्घ बाँकेका पूर्व अध्यक्ष निरज कुमार गौतम, नेपाल प्रेस युनियन बाँकेका अध्यक्ष प्रिया स्मृति ढकाल, समाजबादी प्रेस सङ्गठनका अध्यक्ष लोकनाथ शर्मा लगायत चार दर्जन बढी पत्रकारहरूको सहभागिता थियो । प्रमुख अतिथि ज्ञवालीले पानसमा बत्ती बालेर उद्घाटन गर्नुभएको कार्यक्रमको सञ्चालन पत्रकार महासङ्घ बाँकेका सचिव कृष्ण ओलीले गर्नुभएको थियो ।