बाँकेमा क्यान्सर रोगका विषयमा गहन छलफल गर्न चिकित्सक सम्मेलन हुँदै

नेपालगन्ज । पश्चिम नेपालमै पहिलोपटक बाँकेमा क्यान्सर रोगका बारेमा गहन छलफल गर्न चिकित्सक सम्मेलन हुने भएको छ । बाँकेको खजुरामा रहेको सुशील कोइराला प्रखर क्यान्सर अस्पताल, खजुराको आयोजना तथा मस्कुलोस्केलेटल अनकोलोजी सोसाइटी अफ नेपाल (मोसन) नेपाल र नेपाल अर्थोपेडिक एसोसिएसन (नोए) वेष्टर्न च्याप्टरको सहकार्यमा मङ्सिर २६ र २७ गते हड्डी, मांसपेशी तथा छाला सम्बन्धि क्यान्सरको बृहत् गोष्ठी तथा चिकित्सकीय सम्मेलन हुने भएको हो ।

खजुरामा उद्घाटन सत्र गर्ने र कार्यपत्र प्रस्तुत कार्यक्रम नेपालगन्जमा गर्ने तयारी गरिएको छ । कार्यक्रम गर्नका लागि बनाइएको आयोजक समितिका अध्यक्ष एमएसके अंकोसर्जन डा. गोपाल पौडेलले सम्मेलनमा बाँके र आसपासका जिल्लाका सर्जन, प्याथोलोजिष्ट, अर्थोपेडिक्स, रेडियोलोजिष्ट, मेडिकल अंकोलोजिष्ट तथा रेडियसन अंकोलोजिष्टलाई अस्पतालको सेवाका बारेमा जानकारी दिने र हड्डी, मांसपेशी र छाला सम्बन्धि क्यान्सरको नयाँ प्रविधि र अभ्यासका बारेमा छलफल र आफूहरूले काम गर्दा भोगेका भोगाई साटासाट गर्ने बताउनुभयो । उहाँले सम्मेलनमा भरतपुर, विराटनगर, काठमाडौँ, दाङ, सुर्खेत, कोहलपुर र नेपालगन्जमा कार्यरत क्यान्सर सम्बन्धि चिकित्सकको सहभागिता हुने जानकारी दिनुभयो ।

सुशील कोइराला प्रखर क्यान्सर अस्पतालका डाक्टर एवं आयोजक समितिका सचिव क्लिनिकल अंकोलोजिष्ट डा. मुकेश यादवले सम्मेलनमा दुई सय जनाको सहभागिता रहने र ७ लाख हाराहारीमा खर्च हुने बताउनुभयो ।

पश्चिम नेपालमै पहिलोपटक हुन थालेको यो सम्मेलनले अस्पतालको प्रचारप्रसार र सेवाका बारेमा जानकारी दिने तथा चिकित्सकले खजुरामा बिरामी रिफर गर्ने आशा गरिएको छ । खजुरामा क्यान्सर अस्पताल भए पनि अझै यस क्षेत्रका बिरामी भरतपुर, काठमाडौँ जाने गरेका छन् ।