तिलोत्तमा नगरपालिका असल अभ्यास गर्ने विश्वभरका स्थानीय तहबीच अवार्डको प्रारम्भिक छनौटमा

रुपन्देही। रुपन्देहीको तिलोत्तमा नगरपालिका नागरिक सहभागितामा असल अभ्यास गर्ने विश्वभरका स्थानीय तथा प्रदेश सरकारबीचको अवार्ड प्रतियोगिताको प्रारम्भिक सूचीमा परेको छ । 

अर्जेन्टिनाको इन्टरनेशनल अब्जरभेटरी अन पार्टिसिपेसन (ओआईडिपी) संस्थाले गर्ने २४ औँ संस्करणको अवार्डका लागि तिलोत्तमा प्रारम्भिक सूचीमा परेको हो । तिलोत्तमा नगरपालिकाका निवर्तमान मेयर रहेका प्रतिनिधि सभा सदस्य वासुदेव घिमिरेले सबै पालिकाहरुले यसैगरी लगावका साथ काम गर्ने हो भने सफा र सुन्दर नेपाल सम्भव रहेको बताउनुभयो ।

तिलोत्तमाका मेयर रामकृष्ण खाँणका अनुसार अवार्डका लागि विश्वका ३७ देशका १३७ वटा स्थानीय र प्रदेश सरकारले आवेदन दिएकामा पहिलो चरणमा तिलोत्तमा उत्कृष्ट ४० मा छनोट भएको हो । ओआइडिपीले आफ्नो वेबसाइटमार्फत विभिन्न पाँच वटा विषयमा आवेदन माग गरेकोमा तिलोत्तमा जनसहभागितामा सञ्चालित सरसफाई तथा हरियाली प्रवद्र्धन अभियान अन्तर्गत प्रारम्भिक सूचीमा परेको उहाँले जानकारी दिनुभयो ।

छनोट भएका ४० स्थानीय र प्रदेश सरकारबीच अनलाइन भोटिङको ५० अङ्क र निर्णायकको मूल्याङ्कनको ५० अङ्कको आधारमा आगामी मे महिनाको २१ देखि २३ तारिखसम्म अर्जेन्टिनाको कोर्डोबामा हुने ओआइडिपी कन्फेरेन्स (सम्मेलन)मा अवार्ड विजेता घोषणा गरिने ओआइडिपीको वेबसाइटमा उल्लेख छ ।

तिलोत्तमा प्रारम्भिक सूचीमा परेपछि अनलाइन भोटिङमार्फत मत दिएर जिताउन नेपालभर र विश्वभर रहेका नेपालीलाई मेयर खाणले अपील गर्नुभएको छ । ओआइडिपीले मार्च अन्तिमभित्रै एक हप्ताको अवधि निर्धारण गरी अनलाइन भोटिङ खुला गर्नेछ । अनलाइन भोटिङ गर्दा एक जनाले पाँच वटै विषयमा मत दिनुपर्ने अन्यथा मत रद्द हुने नियम रहेको छ । ओआइडिपीको वेबसाइटमै गएर मत दिन सकिनेछ । तिलोत्तमा नगरपालिकाले २०७४ सालदेखि हरेक १५ दिनमा जनसहभागितामा सरसफाई तथा हरियाली प्रवर्द्धन अभियान गर्दै आएको छ । आठौँ वर्षमा निरन्तर चल्दै आएको अभियानको १ सय ४० औँ शृङ्खला सम्पन्न भएको मेयर खाणले जानकारी दिनुभयो ।