विदेशबाट फर्किएका युवाको उद्यम र चुनावी अपेक्षा

मकवानपुर। आगामी फागुन २१ गतेको निर्वाचन नजिकिँदै गर्दा मकवानपुरमा तयारी अन्तिम चरणमा पुगेको छ।

मतदान केन्द्र व्यवस्थापनदेखि कर्मचारी परिचालनसम्मका काम अन्तिम चरणमा पुगेको प्रदेश निर्वाचन कार्यालय हेटौँडाले जनाएको हो । 

मतदान केन्द्रको लागि आवश्यक सामग्रीको प्राप्ति र कर्मचारी नियुक्ति पछाडि उनीहरूलाई तालिम दिएर मतदान केन्द्रमा पुग्ने गरी तयारी अन्तिम चरणमा पुगेको कार्यालयका प्रमुख हरि प्रसाद ढकालले बताउनुभयो । “निर्वाचन तयारीको काम लगभग सकिसकेको भन्दै उहाँले जिल्लामा निर्वाचन सुरक्षाको अवस्था सामान्य अवस्था रहेको र सबै मतदाताहरूलाई मतदान केन्द्रमा गएर ढुक्कले मतदान गर्न अनुरोध गर्नुभयो । 

निर्वाचन प्रशासनले जिल्लामा तयारी पूरा भएको बताइरहँदा मतदाताको अपेक्षा भने केवल मतदानमा सीमित छैन । विदेशबाट फर्किएर गाउँमै उद्यम गरिरहेका युवाले नयाँ नेतृत्वसँग व्यवहारिक नीतिको माग गरेका छन् । मकवानपुरगढी गाउँपालिकाका प्रेम तिमल्सिना, जो केराको बोक्राबाट हाते कागज उत्पादन गर्दै हुनुहुन्छ, स्वदेशी उत्पादनलाई प्राथमिकता दिनुपर्ने बताउनुहुन्छ । नेपालमा उत्पादनभन्दा आयातमा निर्भरता बढ्दो रहेको प्रति भने उहाँको चिन्ता देखिन्छ । “हामीकहाँ कच्चा पदार्थ छ, तर तयारी सामान विदेशबाट ल्याउँछौँ,” उहाँ भन्नुहुन्छ । 

केराको पकेट क्षेत्र रहेको आफ्नो गाउँमा केरा काटेपछि फालिने बोक्रालाई प्रशोधन गरी कागज उत्पादन गर्न सकिने सम्भावना देखेपछि उहाँले उद्योग सुरु गर्नुभएको हो । मल, रेशा र कागज जस्ता उत्पादनमार्फत फोहोरलाई आम्दानीमा रूपान्तरण गर्ने उहाँको प्रयास अहिले विस्तारको चरणमा छ । मेहनत र लगनशीलताले कुनै पनि काम सफल बनाउन सकिने विश्वास गर्नुहुने उहाँले अब विदेश नफर्किने र यही व्यवसायलाई व्यवस्थित रूपमा विस्तार गर्ने योजना रहेको सुनाउनुभयो । तर उद्यम यात्रा सहज नभएको पनि उहाँ बताउनुहुन्छ । उद्योग दर्ता, कर संरचना, कच्चा पदार्थ व्यवस्थापन र बजार पहुँच जस्ता विषयमा जटिलता रहेको उहाँको अनुभव छ । विदेशी उत्पादनसँग प्रतिस्पर्धा गर्नुपर्दा स्थानीय उत्पादन महँगो पर्न जाने समस्या पनि रहेको उहाँ बताउनुहुन्छ । “उत्पादन गर्छौँ, तर बजार सुनिश्चित छैन,” उहाँको भनाइ छ । आगामी निर्वाचनबाट स्वदेशी उत्पादनलाई प्राथमिकता दिने र साना उद्यमीलाई सहुलियत दिने नीति आउने अपेक्षा उहाँले राख्नुभएको छ ।

यस्तै, भिम्फेदी गाउँपालिका–५ का मनोज कठायत दुई वर्ष विदेशमा होटेल क्षेत्रमा काम गरेर फर्कनुभएको हो । विदेशमा सिकेको सीप र सेवा व्यवस्थापनको अनुभवलाई उहाँले आफ्नै गाउँको होमस्टे व्यवसायमा प्रयोग गरिरहनुभएको छ । “विदेश अन्तिम विकल्प होइन,” उहाँ भन्नुहुन्छ, “सानो लगानी र स्पष्ट योजना भए गाउँमै पनि सम्भावना छ ।”उहाँले भन्नुभयो । उहाँका अनुसार विदेशमा काम गर्दा सिकिएको अनुशासन, सरसफाइ, सेवा शैली र व्यवस्थापन पद्धति यहाँको व्यवसायमा उपयोगी भएको छ । तर नीति अस्थिरता र प्रक्रियागत झन्झटले साना व्यवसायीलाई अप्ठ्यारो पार्ने गरेको उहाँको भनाइ छ । 

स्थिर नीति र सीप विकास कार्यक्रमको अपेक्षा राख्नुहुन्छ । अब बन्ने सरकारले युवालाई आकर्षित गर्ने र परिवारसँगै बसेर सहज रूपमा उद्यम गर्ने वातावरण सृजना गरोस् भन्ने उहाँको अपेक्षा छ । पटक–पटक नियम परिवर्तन हुँदा लगानीकर्ता अन्योलमा पर्ने गरेको अनुभव सुनाउनुहुँदै उहाँले अब बन्ने सरकारले सीपमूलक तालिम र सहुलियत कर्जा दिए थप युवा फर्केर उद्यम गर्न सक्ने धारणा राख्नुभयो । 

उद्योग तथा वाणिज्य कार्यालय मकवानपुरका प्रमुख रामप्रसाद भुसालका अनुसार पछिल्लो समय विदेशबाट फर्केर घरेलु उद्योग दर्ता गर्ने युवाको सङ्ख्या बढ्दो छ । तर सरकारी प्रक्रियाका कारण युवाहरू निराश हुने गरेको उहाँले बताउनुभयो । उद्यमीहरू प्रक्रियागत जटिलता र बजार पहुँचलाई मुख्य चुनौतीका रूपमा लिने गरेको र सरकारले यसमा सहयोग गर्नुपर्ने उहाँले बताउनुभयो । लघु उद्यमीहरूलाई सहुलियतपूर्ण लगानी र बजार व्यवस्थापनमा ध्यान दिनुपर्ने उहाँको धारणा छ । 

फागुन २१ को चुनाव प्रेम र मनोजजस्ता युवाका लागि केवल मतदान मात्र नभई आफ्ना उद्यमको भविष्यसँग जोडिएको विषय बनेको छ । आगामी निर्वाचनपछि बन्ने नीतिमा स्वदेशी उत्पादनलाई संरक्षण गर्दै गाउँमै सम्भावना खोज्ने युवालाई साथ देओस् भन्ने उनीहरूले चाहना राखेका छन् । उनीहरूको ध्यान केवल मतदानमा होइन, उद्यमलाई टिकाउने र सुरक्षित बनाउने नीतिमा पनि केन्द्रित देखिन्छ ।