नेपाली पौडीबाज अथर्वको दुई राष्ट्रिय कीर्तिमान

काठमाडौँ । नेपाली पौडीबाज अथर्व सिंहले ११ औँ एसियाली एक्वेटिक्स च्याम्पियनसिपमा आज दुई नयाँ राष्ट्रिय कीर्तिमान कायम गरेका छन् ।

भारतको अहमदाबादमा जारी प्रतियोगितामा अथर्वले पुरुष एक हजार पाँच सय मिटर फ्रिस्टायल १७ मिनेट ४३.५७ सेकेन्डमा पूरा गर्दै १० वर्षअघि शिरिष गुरुङले बनाएको १८ मिनेट ४५।६२ सेकेन्डको कीर्तिमान भङ्ग गरे । 

सोही स्पर्धामा नेपालका कल्किन श्रेष्ठले पनि शिरीषको कीर्तिमानलाई उछिने । कल्किनले १८ मिनेट ११।११ सेकेन्डमा निर्धारित दूरी तय गरेको पौडीका मुख्य प्रशिक्षक शङ्कर कार्कीले जानकारी दिनुभयो । 

अथर्वले अर्को कीर्तिमान चार सय मिटर व्यक्तिगत मिड्लेमा बनाए । यो स्पर्धामा पनि अथर्वले सन् २०१६ मा शिरीषले नै स्थापित गरेको पाँच मिनेट ०४।७० सेकेन्डको कीर्तिमान तोडेका हुन् ।