प्रधानमन्त्रीको चीन भ्रमणका क्रममा लिपुलेक–लिम्पियाधुरालगायत सीमा समस्याका बारेमा कुरा हुने

काठमाडौँ । सञ्चार तथा सूचना प्रविधि मन्त्री पृथ्वीसुब्बा गुरुङले प्रधानमन्त्री केपी शर्मा ओलीको चीन भ्रमणका क्रममा हुने दुई पक्षीय भेटवार्तामा नेपालको लिपुलेक–लिम्पियाधुरा सीमा समस्या बारेमा कुरा हुने बताउनुभएको छ । 

मन्त्रिपरिषद् बैठकका निर्णयहरू सार्वजनिक गर्न आज सिंहदरबारमा आयोजित पत्रकार सम्मेलनमा सञ्चारकर्मीको एक जिज्ञासामा सरकारका प्रवक्ता समेत रहनुभएका सञ्चारमन्त्री गुरुङले पर्सी भदौ १४ गते देखि हुने प्रधानमन्त्रीको चीन भ्रमणका क्रममा लिपुलेक–लिम्पियाधुरा सीमा समस्याका बारेमा समेत कुराकानी हुने बताउनुभयो । 

सञ्चारमन्त्री गुरुङले भ्रमणका क्रममा चीनका राष्ट्रपति र भारतका प्रधानमन्त्रीसँग छुट्टा–छुट्टै भेट गर्ने कार्यक्रमको तयारी भइरहेको र भेटमा नेपालको लिपुलेक नाका प्रयोग गर्नेबारे चीन र भारत बीच भएको सहमतिमा विरोध जनाउँदै आफ्ना कुरा राख्ने तयारी भइरहेको बताउनुभयो । 

प्रधानमन्त्री केपी शर्मा ओली चीनमा हुने सांघाई को–अपरेशन अर्गनाइजेशनको बैठकमा भाग लिन पर्सी १४ गते चीन भ्रमणमा जाँदै हुनुहुन्छ । 

यसैबीच अस्ति भदौ ९ गते बसेको मन्त्रिपरिषद् बैठकले सामाजिक सञ्जाल सञ्चालकलाई जिम्मेवार तथा जबाफदेही बनाउन सात दिनको समयसीमा तोकी सूचीकरणका लागि सार्वजनिक आह्वान गर्ने निर्णय गरेको छ । 

तोकिएको समयसीमा भित्र सञ्चार मन्त्रालयमा सूचीकरण वा दर्ताका लागि नआउने सामाजिक सञ्जाललाई क्रमशः नेपाल भित्र निष्क्रिय बनाउने र सूचीकरण हुन आएपछि मात्रै त्यस्ता सामाजिक सञ्जालहरू पुनः सक्रिय गराउने निर्णय मन्त्रिपरिषद् बैठकले गरेको सञ्चारमन्त्री गुरुङले जानकारी गराउनुभयो । 

यस्तै मन्त्रिपरिषद् बैठकले नेपाल सरकारबाट घोषणा भएका विभिन्न २० वटा औद्योगिक ग्राम, औद्योगिक क्षेत्र, विशेष आर्थिक क्षेत्र लगायतलाई राष्ट्रिय प्राथमिकता प्राप्त आयोजना निर्धारण गर्ने निर्णय गरेको छ । 

यस्तै बैठकले भौतिक पूर्वाधार तथा यातायात मन्त्रालय र अन्तर्गतका निकायहरूको सङ्गठन तथा व्यवस्थापन सर्भेक्षण गर्न पूर्वस्वीकृति प्रदान गर्ने, नेपाल लेखा परीक्षण सेवाको समूहीकरण तर्फको राजपत्राङ्कित विशिष्ट श्रेणीको उपमहालेखापरीक्षक पदमा इन्द्रप्रसाद आचार्यलाई बढुवा गर्ने, राष्ट्रिय प्राकृतिक स्रोत तथा वित्त आयोगको सचिव भरतमणि सुवेदीको स्वैच्छिक अवकाश स्वीकृत गर्ने लगायतका निर्णयहरू गरेको सरकारका प्रवक्ता एवं सञ्चारमन्त्री पृथ्वीसुब्बा गुरुङले जानकारी दिनुभयो ।