कोरोना उपचार कोषमा आईक्यानद्वारा एक करोड सहयोग

नेपाल चार्टर्ड एकाउन्टेन्ट्स संस्था (आइक्यान) ले कोरोना भाइरस संक्रमण रोकथाम, नियन्त्रण तथा उपचार कोषमा एक करोड रुपैयाँ सहयोग गरेको छ ।

आइक्यान अध्यक्ष कृष्णप्रसाद आचार्यका अनुसार उक्त सहयोग रकम मंगलबार प्रधानमन्त्री तथा मन्त्री परिषदको कार्यालयका सचिव महेन्द्र गुरागाईंमार्फत सरकारलाई हस्तान्तरण गरिएको छ ।

आईक्यान परिषदको गत चैत ३० गते बसेको ‘भर्चुअल’ बैठकले कोराना कोषमा १ करोड रुपैयाँ सहयोग गर्ने निर्णय गरेको थियो ।

परिषद बैठकले चालु आर्थिक वर्ष र आगामी आर्थिक वर्षको वैदेशिक भ्रमण नियन्त्रण र अन्य खर्चहरु कटौती गर्ने समेत निर्णय गरेको छ ।

कमजोर आयस्रोत भएका तथा कोरोना भाइरसको प्रभावले विद्यार्थीलाई पर्न सक्ने आर्थिक समस्यालाई सम्बोधन गर्न नियमित छात्रवृत्तिबाहेक थप राहत कोष स्थापना गर्ने निर्णय पनि गरेको छ । त्यसबाट कमजोर आर्थिक अवस्था भएका विद्यार्थीहरुलाई केही राहत पुग्ने अध्यक्ष आचार्यले बताउनु भयो ।

आईक्यानले कोरोना भाइरसको प्रभावले लेखा व्यवसायमा पर्ने प्रभावका विषयमा अध्ययन गर्न प्राविधिक समिति बनाउने र विद्यार्थीहरुलाई अनलाइन लर्निङ्ग प्लेटफर्म’ तयार गरी भर्चुअल ट्रेनिङ्गका साथै विद्यार्थीका लागि ‘भर्चुअल’ कक्षा व्यवस्थापन समेत गरेको जनाएको छ ।