अध्यागमन कार्यालयका कर्मचारी माथी प्रश्न उठेकाले मन्त्रीले राजीनामा दिनु आवश्यक छैन: सिटौला 

विराटनगर । नेपाली कांग्रेस संसदीय दलका नेता कृष्ण सिटौलाले भिजिट भिसा प्रकरणमा गृहमन्त्रीले राजीनामा दिनु आवश्यक नभएको बताउनु भएको छ ।

विराटनगरमा आज सञ्चारकर्मीसँग कुरा गर्नुहुँदै उहाँले यो विषयमा अध्यागमन कार्यालयका कर्मचारी माथी प्रश्न उठेकाले मन्त्रीले राजीनामा दिनु आवश्यक नभएको प्रष्ट पार्नुभयो । उहाँले सो विषयमा कर्मचारी माथी प्रश्न उठेको छ गृहमन्त्री माथी होइन भन्नुहुँदै मन्त्रालय मातहतका कर्मचारी माथी प्रश्न उठ्दैमा मन्त्रीहरूले राजीनामा दिँदै जाने हो भने सबै मन्त्रीले राजीनामा  दिनुपर्ने अवस्था आउने र राज्य व्यवस्था चल्न नसक्ने बताउनुभयो । 

यस अघि भएका घटनामा मन्त्री हरूमाथि प्रश्न उठेकाले उहाँहरूले राजीनामा दिएको प्रष्ट पार्दै अहिले गृहमन्त्री माथी नभई कर्मचारी माथी  प्रश्न उठेकाले गृहमन्त्रीले किन राजीनामा दिने भनि प्रति प्रश्न गर्नुभयो । उहाँले यस विषयमा नेपाली कांग्रेसको धारणा पनि चाँडै आउने बताउनुभयो ।

एक प्रश्नमा उहाँले अहिले संविधान संशोधन भन्दा पनि संविधान कार्यान्वयन समीक्षा आवश्यक रहको बताउनुभयो । नेता सिटौलाले संविधानले परिकल्पना गरे अनुसार जनताको पक्षमा काम भयो भएन पहिले त्यस विषयमा समीक्षा गरेर संविधान संशोधन प्रक्रिया अघि बढाउनुपर्नेमा उहाँले जोड दिनुभयो । 

 उहाँले नेपालमा सङ्घीय लोकतान्त्रिक गणतन्त्रात्मक व्यवस्थाको विकल्प नभएकाले निरङ्कुश तानासाही व्यवस्था नेपाली जनतालाई स्वीकार्य नहुने बताउनुभयो । लोकतन्त्रको मूल्य मान्यता अनुसार मुलुक धेरै अघि बढी सकेकाले  अव  राजतन्त्र फर्कने कुनै सम्भावना छैन उहाँले भन्नुभयो । उहाँले नेपाली कांग्रेसका महाधिवेशनमा एकवर्ष थप गर्न सकिने कानुनी व्यवस्था भएकाले महाधिवेशनको मिति एक वर्ष थपघट हुने प्रष्ट पार्नुभयो ।