टाइगर कप भलिबल प्रतियोगिता : महिलातर्फ एपिएफ र पुरुषतर्फ पुलिस फाइनलमा प्रवेश 

पोखरा । पोखरामा जारी एनसेल पाँचौँ टाइगर कप राष्ट्रिय तथा अन्तर्राष्ट्रिय भलिबल टाइगर कप प्रतियोगितामा महिला तर्फ सशस्त्र प्रहरी बलको एपिएफ क्लब र पुरुष तर्फ नेपाल पुलिस क्लब फाइनलमा प्रवेश गरेका छन्। शुक्रबार पोखरा रंगशालाको भलिबल कोर्टमा भएको खेलमा जित हासिल गर्दै दुवै टिम फाइनलमा यात्रा बनाएका हुन् । 

शुक्रबार बिहान भएको पहिलो खेलमा आयोजक टाइगर ग्रुपलाई पराजित गर्दै सशस्त्र प्रहरी बल एपिएफ महिलातर्फ फाइनलमा प्रवेश गरेको छ । पराजित भएको आयोजक टाइगर ग्रुपले शनिबार फाइनल प्रवेशका लागि टिपटक न्यू डायमण्ड स्पोट्स क्लबसँग प्रतिस्पर्धा गर्ने भएको छ । 

त्यसै गरी त्रिभुवन आर्मी क्लबलाई पराजित गर्दै नेपाल पुलिस क्लब पाँचौँ टाइगर कप राष्ट्रिय तथा अन्तर्राष्ट्रिय भलिबल प्रतियोगिताको पुरुषतर्फ फाइनलमा प्रवेश गरेको छ । पोखरा रङ्गशालामा शुक्रबार भएको दोस्रो खेलमा आर्मीलाई ३–२ ले पराजित गर्दै पुलिसले फाइनलमा स्थान सुरक्षित गरेको हो । 

एलिमिनेटरमा भारतको सुनिल भलिबल क्लबलाई पराजित गर्दै गण्डकी प्रदेश पोखरामा जारी एनसेल पाँचौँ टाइगर कप राष्ट्रिय तथा अन्तर्राष्ट्रिय भलिबल प्रतियोगिताको पुरुष तर्फ दोस्रो क्वालिफायरमा प्रवेश गरेको छ । पोखरा रङ्गशालामा आज (शुक्रबार) भएको खेलमा सुनिल क्लबलाई ३–१ को सेटमा पराजित गर्दै गण्डकीले दोस्रो क्वालिफायरको यात्रा तय गरेको हो । अब गण्डकीले फाइनल प्रवेशका लागि शनिबार त्रिभुवन आर्मी क्लबसँग खेल्ने भएको प्रतियोगिताका संयोजक रामकृष्ण ज्ञवालीले बताउनु भयो । आर्मीले पहिलो क्वालिफायरमा नेपाल पुलिस क्लबसँग ३–२ सेटले पराजित भएको थियो ।