डोल्पामा सोमबार मात्र मतगणना हुने  

डोल्पा ।  डोल्पामा आज सम्पन्न वडा अध्यक्ष पदको उपनिर्वाचनको मतगणना सोमबार बिहान हुने भएको छ । 

त्रिपुरासुन्दरी नगरपालिका वडा नम्बर ५ ल्हाँमा भएको वडा अध्यक्ष पदको उपनिर्वाचनको मतगणना सोमबार बिहान हुने भएको हो ।  

कुल ३ सय ५३ मतदाता मध्ये ३ सय ३ जना अर्थात् ८५ दशमलव ८४ प्रतिशतले मतदान गरेका छन् । उपनिर्वाचनमा १ सय ४५ जना पुरुष र १ सय ५८ जना महिलाले मतदान गरेका हुन ।

शान्त धाँधलीरहित रुपमा बिहान ९ बजेदेखि मतदान सुरु भएको ल्हाँमा बेलुका ५ बजेसम्म ३ सय ३ जनाले मतदान गरेको मतदान अधिकृत सुमन ढकालले जानकारी दिनुभयो । चिसो मौसमका कारण ढिलो मतदान भएपनि शान्त र मर्यादित तवरले मतदान भएको उहाँले बताउनुभयो ।

आइतबार नै मतगणना गर्ने निर्वाचनको तयारी रहे पनि बिजुली नभएको कारण मतगणना सोमबार बिहान हुने भएको निर्वाचन प्रमुख श्यामकुमार राईले जानकारी दिनुभयो । राति चिसो हुने र बिजुली नभएपछि समस्या हुने भन्दै राजनीतिक दलको सहमतिमा सोमबार बिहान ९ बजेपछि सर्वदलीय बैठक बसी मतगणना सुरु गरिने निर्वाचन प्रमुख राईले बताउनुभयो ।