कोशी अस्पतालबाट तीन वर्षमा साढे तीन लाखभन्दा बढिले लिए बिमा सेवा
विराटनगर । स्वास्थ्य बिमा कार्यक्रम सञ्चालनमा आएपछि विराटनगर स्थित कोशी अस्पतालबाट विगत तीन वर्षमा ३ लाख ५४ हजार बढीले स्वास्थ्य बिमा सेवा लिएका छन् ।
कोशी प्रदेशकै ठुलो उक्त सरकारी अस्पतालको तथ्याङ्क अनुसार सो अवधिमा वयस्क तथा वृद्धवृद्धा ३ लाख २७ हजार ९ सय ९२ जना तथा १८ हजार ५ सय बालबालिकाले स्वास्थ्य बिमा सेवा लिएका छन् ।
चालु आर्थिक वर्ष ०८०–०८१ को असार–२३ गते सम्म १ लाख ३८ हजार ६ सय ३ जनाले सेवा लिएकोमा त्यसमध्ये वयस्क तथा वृद्धवृद्धा १ लाख २९ हजार २ सय ७१ तथा ९ हजार ४ सय ६५ जना बालबालिका रहेका छन् ।
त्यसै गत आर्थिक वर्ष ०७९–०८० मा १ लाख २९ हजार ८ सय ९३ जनाले सेवा लिएकोमा वयस्क तथा वृद्धवृद्धा १ लाख २२ हजार ९ सय ४१ जना तथा ६ हजार ९ सय ५२ जना बालबालिकाले बिमा सेवा लिएका थिए ।
त्यस्तै अघिल्लो आर्थिकवर्ष ०७८–०७९ मा सो अस्पतालबाट ८५ हजार ३ सय ६४ जनाले सेवा लिएकोमा जसमध्ये वयस्क तथा वृद्धवुद्धा ८५ हजार ३ सय ६४ जना तथा बालबालिका ३ हजार ५ सय १३ जना रहेका छन् ।
तीन वर्षको अवधिमा अस्पताले बिमासँग आबद्ध बिमाकर्तालाई ६६ करोड ४३ लाख वरवरको औषधि तथा उपकरण सेवा प्रदान गरेको छ ।
अस्पतालले चालु आर्थिक वर्ष ०८०–०८१ को असार–२३ गतेसम्म २७ करोड २४ लख २१ हजार त्यस्तै गत आर्थिक वर्ष ०७९–०८० मा २५ करोड १३ लाख ६० हजार तथा अघिल्लो आर्थिक वर्ष ०७८–०७९ मा १५ करोड ३८ लाख १९ हजार बराबरको औषधि तथा उपकरण सेवा प्रदान गरेको छ ।
स्वास्थ्य बिमा कार्यक्रम विराटनगर स्थित कोशी अस्पताल, मोरङ सहकारी अस्पताल, हाम्रो अस्पताल र लाइफगार्ड अस्पतालमा सञ्चालनमा छ । स्वास्थ्य बिमामा आबद्ध भएपछि औषधि तथा स्वास्थ्य उपचार सेवा निःशुल्क पाउन थालेपछि बिमा गराउनेहरूको सङ्ख्या दिन प्रतिदिन वढन थालेको छ । कोशी अस्पतालको सेवा प्रभावकारी हुने भएकाले यो अस्पतालबाट सबैभन्दा बढी बिरामीहरूले बिमा सेवा लिने गरेका छन् ।
यसैगरी माघ महिनादेखि नेपाल सरकार स्वास्थ्य बिमा बोर्डले बिमासेवा लाभग्राहीले १० प्रतिशत रकम व्यर्हाेनुपर्ने व्यवस्था गरेको छ । १० प्रतिशत रकम लाभग्राहीले तथा बाँकी ९० प्रतिशत रकम बिमा बोर्डले व्यहाेर्नेगरी सो व्यवस्था कायम गरेको अस्पतालका सूचना अधिकारी इन्दिरा यादवले बताउनुभयो । यसैगरी बिमा सेवालाई पारदर्सी र प्रभावकारी बनाउन बोर्डले बिरामीको पुर्जामा सेवा दिने चिकित्सकको नाम, हस्ताक्षर, छाप तथा एनएमसी नम्बर अनिवार्य गरेको छ ।
बिमामा आबद्ध लाभग्राहीलाई अस्पतालले ११ सय ३० प्रकारको औषधि तथा उपकरण सेवा प्रदान गर्दै आएको छ । सो अस्पतालमा २०७४ साल माघ देखि स्वास्थ्य बिमा कार्यक्रम लागु भएको हो ।
प्रतिक्रिया राख्नुहोस्