जाडोबाट प्रभावित १ सय २० जनालाई कम्बल वितरण

बीरगंज । कठ्याङ्ग्रिँदो जाडो र शितलहरबाट प्रभावित १ सय २० जनालाई आज वीरगंजमा कम्बल वितरण गरिएको छ । 

रुंगटा वेल फेयर सोसाइटी र ग्रिन सिटी सामुदायिक केन्द्रको संयुक्त आयोजनामा जाडोबाट प्रभावितहरूलाई कम्बल वितरण गरिएको ग्रिन सिटी सामुदायिक केन्द्रका अध्यक्ष जप प्रकाश खेतानले जानकारी दिनुभयो ।  

यसैगरी कठ्याङ्ग्रिँदो चिसोबाट बच्न साहिब दरबार सेवा संस्थानले वीरगञ्ज सडक पेटीमा रात बिताउन बाध्य विपन्नहरूलाई न्यानो कपडा उपलब्ध गराएको छ ।

संस्थानले सडक पेटीमा रात गुजार्न बाध्य भएकाहरूलाई गएराति सुतिरहेकै ठाउँमा पुगेर कम्बल उपलब्ध गराएको हो । 

वीरगञ्जको माइस्थान, घण्टाघर, आदर्शनगर, बसपार्क, छपकैया, विर्ता लगायतका स्थानमा खुला आकाशमुनि र सडक पेटीमा सुतिरहेका करिब ३० जनालाई न्यानो कपडा उपलब्ध गराइएको हो । 

बढ्दो शीतलहरीका कारण कठ्याग्रिदो चिसो बढेकाले चिसोकै कारण कसैले ज्यान गुमाउन नपरोस् भन्ने अभिप्रायले न्यानो कपडा उपलब्ध गराइएको संस्थानका अध्यक्ष उमेशलाल सहनीले बताउनुभयो । 

विशेष गरेर रिक्सा, ठेला चालक तथा विपन्न व्यक्तिहरू सडक पेटीमै रात गुजार्न बाध्य छन् । 

रातको समयमा चिसो झनै बढ्ने भएकाले सडक पेटी र खुला स्थानमा रात बिताउन बाध्य व्यक्तिहरूको जीवन रक्षाका लागि आफूहरूले न्यानो कपडा उपलब्ध गराउन थालेको संस्थानका रुपेशमान सिंहले बताउनुभयो ।