सुदूरपश्चिम प्रदेशका मुख्यमन्त्री शाहद्वारा राजीनामा 

धनगढी  । सुदूरपश्चिम प्रदेशका मुख्यमन्त्री कमलबहादुर शाहले राजीनामा दिनुभएको छ । 

आजको प्रदेशसभा बैठकलाई सम्बोधन गर्नुहुँदै मुख्यमन्त्री शाहले पदबाट राजीनामा दिएको घोषणा गर्नुभयो । मुख्यमन्त्री शाहले केहिवेरमा प्रदेश प्रमुख नजिर मियाँसमक्ष राजीनामा पत्र बुझाउने बताइएको छ ।

तत्कालीन सत्ता गठबन्धन दल नेकपा एमालेले समर्थन फिर्ता लिएपछि मुख्यमन्त्री शाह अल्पमतमा पर्नुभएको थियो । संवैधानिक व्यवस्थाबमोजिम आजसम्म प्रदेशसभाबाट विश्वासको मत लिई सक्नुपर्ने भए पनि विश्वासको मतको पक्षमा बहुमत नपुग्ने देखिएपछि मुख्यमन्त्री शाहले राजीनामा दिनुभएको उहाँको सचिवालयले जनाएको छ । 

दुई पटक प्रदेश सरकारको नेतृत्व गर्नुभएका मुख्यमन्त्री शाहले प्रदेशको विकास र समृद्धिका लागि सबैलाई एकजुट भएर अघि बढ्नुपर्ने बताउनुभयो । आफ्नो ३८ महिने कार्यकालमा सुशासन प्रवर्द्धन, प्रभावकारी सेवा प्रवाह, जनहितलाई प्राथमिकता दिएर काम गरेको उहाँले बताउनुभयो । 

मुख्यमन्त्री शाहले प्रदेशसभाबाट पारित सरकारको नीति तथा कार्यक्रम अनुसार नयाँ बजेट ल्याइएको बताउनुभयो । उहाँले सत्ता गठबन्धन दलका कारण नयाँ बजेट पारित नभएको बताउनुभयो  ।