‘युवालाई विदेश पलायन हुनबाट रोक्न सहकारीले योगदान दिनुपर्छ’

ललितपुर । सहकारी अभियन्ता एवम् सरोकार भएकाहरूले युवाहरूलाई विदेश पलायन हुनबाट रोक्न सहकारीले योगदान दिनुपर्ने बताएका छन् । राष्ट्रिय सहकारी महासङ्घद्वारा आज यहाँ आयोजित दोस्रो राष्ट्रिय सहकारी युवा तथा प्रविधि सम्मेलन २०८२ को उद्घाटन समारोहमा वक्ताहरूले हाल देखिएका समस्या समाधान गर्दै सहकारीबाट लाभ लिनुपर्नेमा जोड दिए । 

कार्यक्रममा भूमि व्यवस्था, गरिबी निवारण तथा सहकारी मन्त्रालयका सचिव मदन भुजेलले विसं २०४६ को परिवर्तनपछि देशमा समृद्धि ल्याउने अभिप्रायले सहकारीको स्थापना गरिएको बताउँदै यसले रोजगारी र आर्थिक समृद्धिमा धेरै उपलब्धिपूर्ण काम गरेको बताउनुभयो । उहाँले सहकारीले वित्तीय पहुँचमा महत्त्वपूर्ण योगदान पुर्‍याएको भन्दै हाल देखिएका समस्या समाधान गर्दै अगाडि बढ्नुपर्ने धारणा राख्नुभयो ।

“सहकारीले महिलाको आर्थिक सशक्तीकरणमा महत्त्वपूर्ण योगदान पुर्‍याएको छ । अब युवालाई पनि स्वदेशमै उत्पादन र आर्थिक उपलब्धि हासिल गर्न यस क्षेत्रले भूमिका खेल्नुपर्छ । युवाको योगदानमा आधारित अर्थतन्त्रबिना देशको समृद्धि हासिल हुन सक्दैन”, सचिव भुजेलको भनाइ थियो । 

राष्ट्रिय सहकारी नियमन प्राधिकरणका अध्यक्ष डा खगराज शर्माले सहकारी र राज्य मिलेर युवा परिचालनमार्फत नवप्रवर्तन र उद्यमशीलमार्फत समृद्धि हासिल गर्न लाग्नुपर्नेमा जोड दिनुभयो ।

महासङ्घका कार्यवाहक अध्यक्ष रमेशप्रसाद पोखरेलले धेरै मुलुक सहकारीकै माध्यमबाट समृद्ध भएको उल्लेख गर्दै नेपालमा पनि यसबाट धेरै लाभ लिन सकिने बताउनुभयो । उहाँले प्रविधिको प्रयोग र संविधानको भावनाअनुरूप नीतिगत व्यवस्था गर्दै सहकारीलाई अर्थतन्त्रको मजबुत खम्बाको रूपमा विकास गरिनुपर्ने धारणा राख्नुभयो । 

कार्यक्रमका संयोजक एवम् राष्ट्रिय सहकारी महासङ्घका सञ्चालक सुमन नेपालले विश्व परिवेशलाई आत्मसाथ गर्दै युवाहरूको नवीन सोच र प्रविधिप्रतिको दख्खललाई सहकारीको मूल्य–मान्यतासँग जोड्नु नै सम्मेलनको मुख्यध्येय भएको बताउनुभयो । 

आजबाट सुरु भएको बुधवार सम्पन्न हुनेछ । रासस