लैङ्गिक हिंसाविरुद्धको १६ दिने अन्तर्राष्ट्रिय अभियान सुरु
'ग्रामीण महिलाको अवस्था अझै कष्टकर, चेतना विकास अपरिहार्य'
काठमाडौँ। प्रधानमन्त्री सुशीला कार्कीले महिलाका सन्दर्भमा बनेका राम्रा कानुन कार्यान्वयनमा समस्या देखिएको बताउनुभएको छ ।
महिला बालबालिका तथा ज्येष्ठ नागरिक मन्त्रालयले आज प्रधानमन्त्री कार्यालयमा लीगकै हिंसा विरुद्धको १६ दिने अन्तर्राष्ट्रिय अभियानको शुभारम्भ समारोहमा प्रधानमन्त्री कार्कीले कुनै एक महिला प्रधानमन्त्री र राष्ट्रपतिको कुर्सीमा बस्दैमा महिलाको सहभागिता सुनिश्चित भई समानता आएको मान्ने अवस्था नभएको बताउनुभयो ।
महिलाहरू राजनीतिमार्फत नीति निर्माण तहमा पुग्ने सके मात्रै महिलाका सवालमा निर्णय गर्न सकिने बताउनुहुँदै प्रधानमन्त्री कार्कीले समाजमा महिलामाथि हुने हिंसा निवारण गर्न समाजलाई जगाउनुपर्नेमा जोड दिनुभयो ।
अझै पनि ग्रामीण क्षेत्रका महिलाहरू कष्टकर जीवन जिउन विवश भएको बताउनुहुँदै प्रधानमन्त्री कार्कीले समाजमा महिला पुरुष समान हुन भन्ने भावना विकास गराउनुपर्ने विचार व्यक्त गर्नुभयो ।
यस अवसरमा महिला बालबालिका तथा ज्येष्ठ नागरिक मन्त्रालयका सचिव लक्ष्मी बस्नेतले महिलाको आर्थिक सशक्तीकरणका लागि सरकारले विभिन्न कार्यक्रम गरिरहेको जानकारी दिनुभयो ।
राष्ट्रिय महिला आयोगकी अध्यक्ष कमला पराजुलीले प्रविधिको दुरुपयोगबाट महिला तथा किशोरीहरूमाथि हिंसा बढेको भन्दै लीगकै हिंसा विरुद्धको अभियानलाई अझ सशक्त बनाउनुपर्नेमा जोड दिनुभयो । त्यसै गरी महिला हिंसाविरुद्धको पुरुष अभियानका संयोजक संजोग ठकुरीले महिला हिंसा अन्त्यका लागि पुरुष अभियान महत्त्वपूर्ण हुने बताउनुभयो ।
प्रत्येक वर्ष नोभेम्बर २५ तारिखदेखि डिसेम्बर १० तारिखसम्म लैङ्गिक हिंसाविरुद्धको अन्तर्राष्ट्रिय १६ दिने अभियानका रूपमा विश्वभरि नै मनाइने गरिन्छ ।
प्रतिक्रिया राख्नुहोस्