जेन–जी आन्दोलनमा क्षतिग्रस्त सरकारी कार्यालयलाई बैजनाथ गाउँपालिकाको सहयोग

बाँके । गत भदौ २४ गतेको जेन–जी आन्दोलनका क्रममा भएको आगजनी, लुटपाट र तोडफोडबाट क्षतिग्रस्त भएका सरकारी कार्यालयलाई बाँकेको बैजनाथ गाउँपालिकाले आवश्यक सामग्री सहयोग गरेको छ। गाउँपालिकाले जिल्ला प्रशासन कार्यालय बाँके, उच्च अदालत नेपालगञ्ज इजलास र कोहलपुर नगरपालिकालाई कम्प्युटर र प्रिन्टर एक/एक थान हस्तान्तरण गरेको हो।

गाउँपालिका अध्यक्ष प्रकाशबहादुर शाहीले जिल्ला प्रशासन कार्यालय बाँकेका सहायक प्रमुख जिल्ला अधिकारी पूर्णबहादुर खत्री, कोहलपुर नगरपालिकाका प्रमुख प्रशासकीय अधिकृत मानबहादुर गिरी र उच्च अदालत नेपालगञ्ज इजलासका कर्मचारीलाई सामग्री हस्तान्तरण गर्नुभयो।

सामान हस्तान्तरणका क्रममा गाउँपालिका अध्यक्ष शाहीले आन्दोलनका क्रममा सरकारी सम्पत्तिमा व्यापक क्षति पुगेकाले जनसेवामा पुनः सहजता ल्याउने उद्देश्यले सहयोग गरिएको बताउनुभयो।

यसअघि पनि बैजनाथ गाउँपालिकाले इलाका प्रशासन कार्यालय कोहलपुरलाई यस्तै प्रकारको कम्प्युटर र प्रिन्टर सहयोग गरेको स्मरण गर्दै अध्यक्ष शाहीले स्थानीय तहको भूमिकाले सङ्कटपछि पुनः संस्थागत क्षमताको पुनर्स्थापनामा सहयोग पुग्ने विश्वास व्यक्त गर्नुभयो।

कम्प्युटर र प्रिन्टर प्राप्त गरेपछि क्षतिग्रस्त कार्यालयका कर्मचारीहरूले सेवाग्राहीका कामकाज सहज हुने विश्वास व्यक्त गरेका छन्।