संविधान दिवस: सैनिकमञ्च टुँडिखेलमा विशेष समारोह

काठमाडौँ । सरकारले संविधान दिवसका अवसरमा शैनिकमञ्चमा एक समारोहको आयोजना गरेको छ । 

समारोहलाई सम्बोधन गर्नुहुँदै प्रधानमन्त्री सुशीला कार्कीले राज्यका सबै संयन्त्रमा युवाहरूले आफ्नो उपस्थिति देख्न चाहेकाले सोहीअनुसार सरकार काम गर्न प्रतिबद्ध रहेको बताउनुभयो । 

संविधानका अक्षरभन्दा जनताका भावना ठुलो हुने बताउनुहुँदै प्रधानमन्त्री कार्कीले आवश्यक परे संस्थागत रूपमा कानुनमा संशोधन गरेर जनताको सेवालाई प्रभावकारी बनाउन आवश्यक भएको बताउनुभयो । 

प्रधानमन्त्री कार्कीले संविधानले  सङ्घ प्रदेश र स्थानीय तहमा अधिकारको बाँडफाँड र जनताको पहुँचमा गुणस्तरीय र छरितो सेवा प्रदान गर्ने आधार प्रदान गरेको भन्नुहुँदै जनताको भावना र आवश्यकताअनुसार राज्य संयन्त्र क्रियाशील हुनुपर्नेमा जोड दिनुभयो ।

जेनजी आन्दोलनका क्रममा पुगेको सार्वजनिक सम्पत्तिको क्षतिको पुनर्निर्माण गर्न र तोकिएको समयमा निर्वाचन सम्पन्न गर्ने काममा सहयोग गर्न सम्पूर्ण युवापुस्तालाई  प्रधानमन्त्री कार्कीले आग्रह गर्नुभयो । 

समारोहमा राष्ट्रपति रामचन्द्र पौडेल, प्रधानन्यायाधीश प्रकाशमान सिंह राउत  सभामुख देवराज घिमिरे, राष्ट्रियसभाका अध्यक्ष नारायणप्रसाद दाहाल, संवैधानिक निकायमा प्रमुख तथा उच्च पदस्थ व्यक्तिहरूको सहभागिता रहेको थियो ।