‘समयमै सजगता नअपनाउने हो भने ठूलो वातावरणीय समस्या निम्तिन सक्छ’

पोखरा । गण्डकी प्रदेशका प्रदेश प्रमुख डिल्लीराज भट्टले समयमै सजगता अपनाउन नसके ठूलो वातावरणीय समस्या निम्तिन सक्ने बताउनुभएको छ । 

कानुनी युवा मञ्च (फ्लाई) ले कास्कीको माछापुच्छ्रे गाउँपालिकाको अस्ताममा आयोजना गरेको ‘दक्षिण एशियाली जलवायु न्याय फेलोशिप तथा क्याम्प २०२५’ मा उहाँले समयमै सजगता अपनाउन नसके ठूलो वातावरणीय समस्या निम्तिन सक्ने बताउनुभयो ।

उहाँले भन्नुभयो ‘हामी विकास र समृद्धिको युगमा छौँ, औद्योगिक विकासका कारण हरितगृह ग्याँस उत्सर्जन बढ्न गई पृथ्वीको औषत तापक्रम वृद्धि भएर वातावरणीय अवस्थामा असन्तुलन परिवर्तन आएको छ ।’ सन् २०३० सम्म नेपालको तापक्रम १.७ डिग्री सेल्सियसले बढ्ने अनुमान गरिएको प्रदेश प्रमुख भट्टले जनाउनुभयो ।

अब ढिला नगरी जलवायु परिवर्तनबाट प्रमुख मार खेप्नुपरेका विकासोन्मुख मुलुकहरूले न्यूनीकरणका लागि पहलकदमी चाल्नु जरुरी भइसकेको प्रदेश प्रमुख भट्टको भनाई थियो । वातावरणीय प्रभाव मूल्याङ्कनको सीमामा रहेर दिगो विकासको अवधारणा अवलम्बन गर्न आवश्यक रहेको उहाँको भनाई थियो । यो क्याम्प नेपालका लागि मात्र नभई दक्षिण एसियामा नै जलवायु परिवर्तनका कारण र असर र समाधानका लागि फलदायी बन्ने विश्वास उहाँले व्यक्त गर्नुभयो ।