मुलुकभर ईद उल फित्र मनाइयो

काठमाडौँ । इस्लाम धर्मावलम्बीको चाड ईद (ईद उल ) आज मुलुकभर नमाज पढेर खुसी साटासाट गर्दै मनाइएको छ ।
मुस्लिम समुदायले एक महिनाको व्रत (रोजा) बस्न तथा दान दक्षिणा दिन सफल भएको खुसीयालीमा यो पर्व मनाउने गर्छन् ।
आजको दिनलाई ‘ईद उल फित्र’ भनिन्छ । ‘ईद’ को अर्थ खुसी साटासाट गर्नु हो । मुस्लिम समुदायले आज बिहानै उठेर नुहाई धुवाइ गरेर खुला स्थान वा नजिकको मस्जिदमा गएर नमाज पढ्ने गर्छन् । नमाज पढेपछि परिवारजन तथा साथीभाइसँग भेटघाट गरेर खुसी साटासाट गर्ने प्रचलन रहेको मुस्लिम अगुवाको भनाइ छ ।
ईदमा विशेष नमाज समर्पण गरिसकेपछि आफूभन्दा ठुलाबडाबाट आशीर्वाद लिने र आफूभन्दा सानालाई आशीर्वाद दिने गरिन्छ । यस अवसरमा विभिन्न मिष्टान्न, परिकार खाने र खुवाउने परम्परा रहिआएको छ । मुस्लिम आयोगको अगुवाइ र धार्मिक संस्थासँगको सहकार्यमा काठमाडौँसहित विभिन्न जिल्लाबाट आइतबार साँझ चन्द्रमा देखिएको एकीन गरिएको र आज सार्वजनिक बिदा दिन सरकारसमक्ष सिफारिस गरिएअनुसार भएको आयोगका कार्यवाहक अध्यक्ष महमदिन अलीले जानकारी दिनुभयो ।
गणतन्त्रको घोषणा भएपछि सरकारले ईदका अवसरमा सार्वजनिक बिदा दिँदै आएको छ । सरकारी तथ्याङ्कअनुसार मुलुकमा कुल जनसङ्ख्याको पाँच दशमलव नौ प्रतिशत मुस्लिम समुदायको जनसङ्ख्या छ । तराई÷मधेसका रौतहट, कपिलवस्तु, बारा र बाँके तथा पहाडका गोरखा, अर्घाखाँची र कास्कीलगायत जिल्लामा मुस्लिम समुदायको बाहुल्यता छ ।
कावा अध्यक्ष अलीले मुस्लिम समुदायलाई राज्यको मूल प्रवाहमा ल्याउन आयोगले विभिन्न कार्यक्रम गर्दै आइरहेको बताउनुभयो । उहाँले ईदका अवसरमा स्वदेश तथा विदेशमा रहनुभएका सम्पूर्ण मुस्लिम दाजुभाइ, दिदीबहिनीमा शुभकामना व्यक्त गर्नुभयो । ईदले धार्मिक सहिष्णुतासहित एकता, सद्भाव र मित्रता कायम गर्न प्रेरणा प्रदान गर्ने अलीको विश्वास छ ।
प्रतिक्रिया राख्नुहोस्