महिला गोल्डकप : बागमतीलाई हराउँदै पुलिस क्लब सेमिफाइनलमा

इलाम । विभागीय टोली नेपाल पुलिस क्लब काठमाडौँ बाग्मती युथ क्लब सर्लाहीलाई हराउँदै इलाममा जारी दोस्रो संस्करणको अन्तर्राष्ट्रिय आमन्त्रित महिला गोल्डकपमा सेमिफाइनल प्रवेश गरेको छ ।

खेलको पहिलो हाफमा दुवै टोलिले गोल रहित बराबरी खेलेका थिए । पुलिसको तर्फबाट थुप्रै अवसर पाए पनि गोल हुन सकेको थिएन । दबाबमा रहेको बाग्मतीले पनि पाएको अवसरलाई गोल गर्न सकेन । 

दोस्रो हाफमा पनि दबाबमा राखेको पुलिसले खेल सञ्चालन भएको १५ औ मिनेटमा बाग्मतीका खेलाडीले डि बक्स एरियामा बल हातले छुँदा पेनाल्टीको अवसर पाएको पुलिसले पेनाल्टी मिस गर्न पुग्यो । राष्ट्रिय टिमकी डिफेन्डर समेत रहेकी पूजा रानाले पेनाल्टी प्रहारलाई गोल गर्न सकिनन् । 

निर्धारित समयमा दुवै टोलिले गोल गर्न नसकेपछी खेलको विजय टोली टाई ब्रेकरबाट निर्धारण गरिएको थियो । टाई ब्रेकरमा ३/१ गोल अन्तरले बाग्मती युथ क्लबलाई पराजित गर्दै नेपाल पुलिस क्लब सेमिफाइनल प्रवेश गरेको हो । ट्राई ब्रेकरमा पुलिसको तर्फबाट निरु थापाको प्रहार बाहिरिएको थियो भने बाग्मतीको तर्फबाट सेमि हाङ्मा लिम्बू, बिष्णु माया बल र अञ्जलि खवासको प्रहार लाई गोल रक्षक उषा नाथले बचाउ गर्दै सेमिफाइनल यात्रा तय गरेको हो ।

ओएसिस क्लब इलामको आयोजनामा अन्तर्राष्ट्रिय आमन्त्रित महिला गोडकपको दोस्रो संस्करण हिजोबाट सुरु भएको हो । फाइनल खेल आगामी फागुन २४ गते सम्पन्न हुनेछ । फाइनल जित्ने टोलिले नगद रु ४ लाख आकर्षक ट्रफी मेडल र प्रमाणपत्र प्राप्त गर्नेछ भने उपविजेता बनेको टोलिले नगद रु २ लाखमा चित्त बुझाउने छ । त्यस्तै खेलाडीहरूलाई विधागत रुपमा समेत पुरस्कार रहेको आयोजकले जानकारी दिएको छ । 

भोलि विभागीय टोली त्रिभुवन आर्मी र डिफेन्डिङ च्याम्पियन मानेभञ्ज्याङबिच हुनेछ ।