फाल्गुनन्द गोल्डकप : न्यू स्टारलाई हराउँदै मच्छिन्द्र क्लब सेमिफाइनलमा 

पाँचथर । पाँचथरको फिदिममा सञ्चालन भइरहेको ११ औँ संस्करणको फाल्गुनन्द गोल्डकप फुटबल प्रतियोगितामा काठमाडौँको मच्छिन्द्र फुटबल क्लब सेमिफाइनलमा प्रवेश गरेको छ ।

मङ्गलवार फिदिम मा.वि.को खेलमैदानमा सम्पन्न खेलमा सुनसरीको न्यु स्टार फुटबल क्लबलाई  ६–२ को फराकिलो गोल अन्तरले पराजित गर्दै मच्छिन्द्र  क्लब सेमिफाइनलमा पुगेको हो । मच्छिन्द्रका तर्फबाट आदित्य शाक्य र सौरब सुब्बाले समान १/१ गोल गर्दा मनिस डाँगी र बिजु भुजेलले समान २/२ गोल गरे । न्यु स्टारको तर्फबाट सुशील राई र सन्दिप श्रेष्ठले १/१ गोल गरे खेलको म्यान अफ द  म्याच मच्छिन्द्रका सनिस श्रेष्ठ घोषित हुँदै नगद १० हजार रूपैँया प्राप्त गरे । 

बाइ पाएर क्वाटरफाइनल खेलेको न्यु स्टार क्लब हार सँगै प्रतियोगिताबाट बाहिरिएको छ । बुधबार हुने  खेलमा चर्च व्वाइज युनाइटेड  र  विराटनगर सिटी फुटबल क्लब  बीच प्रतिस्पर्धा हुनेछ ।

फिदिम स्पोर्टिङ क्लबको आयोजनामा आगामी पौष १५ गतेसम्म हुने प्रतियोगिताको विजेताले नगद १० लाख ५ सय ५५ रुपैयाँ र उपविजेताले ५ लाख ५ सय ५५ रुपैयाँ पाउने आयोजकले जनाएको छ । यो पुरस्कार राशि जिल्लाकै सर्वाधिक हो । प्रतियोगिताको सर्वोकृष्ट खेलाडीले एक थान इभी स्कुटर प्राप्त गर्नेछन् । प्रत्येक खेलमा म्यान अफ दि म्याच हुने खेलाडीले नगद १० हजार पाउँदा सर्वाधिक गोलकर्ताले नगद १५ हजार पाउनेछन् । यसैगरी, उत्कृष्ट रक्षक, प्रशिक्षक, फरवार्ड, मिडफिल्डर, गोलरक्षक र उदयमान खेलाडीले समान १०/१० हजार प्राप्त गर्नेछन् ।