लुम्बिनी वाणिज्य क्याम्पस छिट्टै मानित विश्वविद्यालय हुनेछ : अर्थमन्त्री पौडेल

रुपन्देही । बुटवलको लुम्बिनी वाणिज्य क्याम्पसमा चौथो अन्तर्राष्ट्रिय कन्फिडेन्स शुक्रबारदेखि सुरु भएको छ ।

बुटवल अन्तर्राष्ट्रिय सम्मेलन केन्द्रमा उपप्रधान तथा अर्थमन्त्री विष्णु पौडेलले इन्टरनेशनल कन्फिडेन्स अन ग्लोबल इनोभेसन इन म्यानेजमेन्ट एण्ड सोसल साइन्स (प्रज्ञानम् ब्रह्म–०४) को उद्घाटन गर्नुभएको हो ।

कार्यक्रममा अर्थमन्त्री पौडेलले शैक्षिक क्षेत्रमा देशकै नमुना क्याम्पसको रुपमा परिचित लुम्बिनी वाणिज्य क्याम्पस मानित विश्वविद्यालयको रुपमा प्रमाणित गरेको बताउनुभयो । उहाँले आगामी दिनमा मानित विश्वविद्यालयका रुपमा स्थापित हुने चाहना छिटै पूरा हुने बताउँदै नेपाल सरकारबाट आवश्यक सहयोग गर्ने प्रतिबद्धता व्यक्त गर्नुभयो ।

उहाँले विश्व विद्यालयको शिक्षा अनुसन्धानमूलक हुन जरुरी रहेको बताउँदै उच्च शिक्षा र सीपका लागि लगानी बढाउनुपर्ने तथा ज्ञान देशको आर्थिक विकाससँग प्रत्यक्ष जोडिएको र आर्थिक एवम् मानवीय विकासमा ज्ञानको अहम् भूमिका भएको जनाउनुभयो । उहाँले परिवर्तित विश्व परिवेशमा अनुसन्धान र नवप्रवर्तन बढ्दै गएकोले ज्ञान र प्रविधिलाई उत्पादन र उत्पादकत्वसँग बढाउन सके ‘सुखी नेपाली र समृद्ध नेपाल’ बन्ने बताउनुभयो ।

क्याम्पस प्रमुख डा. ताराप्रसाद उपाध्यायले विभिन्न देशका विज्ञहरूलाई ल्याएर अनुसन्धानका लागि चौथो पटक यस्तो कार्यक्रम गरिएको बताउनुभयो ।

अनुसन्धान विभाग प्रमुख पीताम्बर सापकोटाले सबै क्षेत्रका विज्ञहरुको कार्यक्रममा सहभागिता रहेको जानकारी दिनुभयो । शुक्रबार त्रिभुवन विश्वविद्यालय व्यवस्थापन संकायका डीन प्राध्यापक डा. डिल्लीराज शर्मासहित भारत, चीन, मलेसिया, थाइल्यान्डका विभिन्न विश्वविद्यालयका प्रोफेसर तथा डाक्टरहरूले अवधारणा राखेको अध्यापक माधवकुमार पौडेलले जानकारी दिनुभयो । त्यसबाहेक सरकारी तथा गैरसरकारी संस्थाका अनुसन्धानकर्ता समेत गरी १ सय २० बढी अनुसन्धानकर्ताले अनुसन्धान पत्र प्रस्तुत गर्नेछन् ।

सम्मेलनमा नेपालसहित भारत, पाकिस्तान, चीन थाइल्याण्ड, मलेसिया लगायतका विभिन्न विश्व विद्यालयका पदाधिकारी, वरिष्ठ प्राध्यापक, विद्यार्थी, अनुसन्धानकर्ता, सरकारी तथा गैरसरकारी अभ्यासकर्ताहरूले अनुसन्धानको निष्कर्ष प्रस्तुत गर्नेछन् ।

लुम्बिनी वाणिज्य क्याम्पसले सञ्चालन गर्दै आएको यो चौथो कन्फिडेन्स हो ।