डिउटीमा रहेका प्रहरीमाथि हातपात गर्ने ५ जना पक्राउ

डडेल्धुरा । डडेल्धुरामा डिउटीमा रहेका प्रहरी सहायक हवल्दार माथी हातपात गर्ने ५ जना पक्राउ परेका छन् । कार्तिक २० गते साँझ साढे ६ बजे अमरगढी ५ बागबजार पोस्टमा डिउटी गरिरहेका प्रहरी सहायक हवल्दार ठानेश्वर प्रकाश पन्त माथि कुटपिट भएको जिल्ला प्रहरी कार्यालय डडेल्धुराले  विज्ञप्ति मार्फत जानकारी दिएको छ ।

 धनगढीबाट डडेल्धुरा आउँदै गरेको भारतीय जीजे ०५ आरभी ८८४८    नम्बरप्लेटको कारलाई चेकजाँच गर्दा कारचालक कञ्चनपुरको भीमदत्त नगरपालिका वडा नं ४ का २२ वर्षीय रोहित सार्की र अजयमेरु गाउँपालिका वडा नं ४ का २२ वर्षीय विनोद बैजलाई प्रहरीले घटनास्थलबाटै पक्राउ गरेको जनाएको छ ।

सार्की र बैज लगायत पाँच जनाको समूहले प्रहरी सहायक हवल्दार पन्तमाथि हातपात र ढुङ्गा हानेकोमा अन्य तीनजनालाई पनि विभिन्न स्थानबाट पक्राउ गरिएको डडेल्धुराका प्रहरी प्रवक्ता, प्रहरी निरीक्षक उपेन्द्र बहादुर बमले बताउनुभयो । 

घटनास्थलबाट फरार रहेका अन्य तीनजना अजयमेरु गाउँपालिका ४ का २६ वर्षीय पदम चटौत,२३ वर्षीय सुवास बोहरा र २७ वर्षीय जीत ऐरलाई पनि नियन्त्रणमा लिई सार्वजनिक सुरक्षासहित, स्वास्थ्य र नैतिक विरुद्धको अपराधमा ७ दिनको म्याद थप गरि अनुसन्धान भइरहेको प्रहरीले जनाएको छ ।

घाइते पन्तको डडेल्धुरामा उपचार सम्भव नभएपछि धनगढी स्थित मायामेट्रो अस्पतालमा उपचार भैरेकोमा पन्तलाई आज नै डिस्चार्ज गरिन लागेको प्रहरी निरीक्षक बमले बताउनुभयो ।