पोखरामा नक्कली सुन धितोमा राखी २४ लाख ठगी 

कास्की  । पोखरामा नक्कली सुन धितोमा राखेर कर्जा लिने एकजना पक्राउ परेका छन् ।  पक्राउ पर्नेमा पर्वतको कुश्मा नगरपालिका वडा नं ३  स्थायी घर भई हाल  पोखरा महानगरपालिका वडा नं १८ सराङकोट बस्ने  २५ वर्षीय अभिसेक सुनार रहेको जिल्ला प्रहरी कार्यालय कास्कीले जनाएको छ । 

सुनारले नक्कली सुन धितोमा राखी पटक पटक पोखराका राष्ट्रिय वाणिज्य बैकहरूबाट कर्जा लिएको प्रहरीले जनाएको छ । उनले राष्ट्रिय वाणिज्य बैङ्क लिमिटेडको पोखरा १७ बिरौटा शाखा र पृथ्वीचोकको शाखाबाट चौबीस लाख पाँच हजार रुपैयाँ कर्जा लिएको प्रहरीले जनाएको छ । 

उनले बिरौटा शाखाबाट सोह्र लाख साठी हजार र दोस्रो पटक पृथ्वीचोक शाखाबाट सात लाख पैँतालिस हजार कर्जा ठगी गरेको जिल्ला प्रहरी कार्यालय कास्कीले जनाएको छ । 

लामो समयसम्म कर्जाको व्याज तथा साँवा बुझाउन नआएपछि शङ्का लागेर सुनारले धितो राखेको गरगहना चेक गर्दा कमसल सुन प्रयोग गरि तयार गरिएको गरगहना पाइएको थियो । 

घटना खुल्नमा आएपछि जिल्ला प्रहरी कार्यालय कास्कीबाट खटिएको प्रहरी टोलीले उनलाई पक्राउ गरेको थियो ।  पक्राउ गरी  जिल्ला अदालत कास्कीबाट ठगी, आपराधिक विश्वास घात तथा आपराधिक लाभ सम्बन्धी कसुरमा  पाँच दिन म्याद थप गरी थप अनुसन्धान प्रक्रिया अगाडी बढाइएको जनाइएको छ ।

अनुसन्धानको क्रममा सुनारले धितोमा राखेका गरगहनाहरू नेपाल सुनचाँदी व्यवसायी संघ कास्कीमा चेक जाँचको लागि पठाइएको थियो ।  गरगहना नक्कली सुनबाट तयार गरिएको प्रतिवेदन प्राप्त भएको जनाइएको छ ।