तिलोत्तमाको मेयरमा कांग्रेसका खाँण र उपमेयरमा एमालेकी चौधरी विजयी

तिलोत्तमा । रुपन्देहीको तिलोत्तमा नगरपालिकाको मेयरमा नेपाली कांग्रेसका रामकृष्ण खाँण विजयी हुनुभएको छ । उहाँ नेकपा एमालेका मोहन चापागाईँलाई ७६५ मतान्तरले पराजित गर्दै  तिलोत्तमा नगरपालिकाको मेयरमा निर्वाचित हुनुभएको हो । 

खाँणले २४ हजार ३९६ मत ल्याएर नगर प्रमुखमा विजयी हुँदा उहाँका निकटतम प्रतिद्वन्द्वी एमालेका चापागाईँले २३ हजार ६३१ मत प्राप्त गर्नुभयो ।  खाँण नेपाली कांग्रेस रुपन्देहीका जिल्ला सभापतिसमेत हुनुहुन्छ भने उहाँ गृहमन्त्री तथा नेपाली कांग्रेसका केन्द्रीय सदस्य बालकृष्ण खाँणका सहोदर भाइ हुनुहुन्छ ।

तिलोत्तमाको उपमेयरमा  भने फराकिलो मतान्तरसहित नेकपा एमालेकी जागेश्वरीदेवी चौधरी विजयी हुनुभएको छ । चौधरीले २३ हजार ८६ मत प्राप्त गर्दा उहाँका निकटतम प्रतिद्वन्द्वी गठबन्धनको तर्फबाट माओवादी केन्द्रका हेमलाल पाण्डेले ११ हजार ५४६ मत प्राप्त गर्नुभयो ।  २०७४ को स्थानीय तह निर्वाचनमा तिलोत्तमा नगरपालिकाको मेयर र उपमेयर दुवै एमाले विजयी भएको थियो । कुल १७ वटा वडा रहेको तिलोत्तमा नगरपालिकामा ९ वटा वडाको अध्यक्षमा कांग्रेस र ८ वडाको अध्यक्षमा एमालेले जित हासिल गरेको छ ।