गाउँमा देखिनै छाड्यो तोरीबारी ,आयातित तेलको प्रयोग बढ्दो

बाजुरा । बाजुरा लगायत सुदूरपश्चिमका पहाडी गाउँमा पछिल्लो समय तोरी उत्पादन घट्दो क्रममा छ ।

जिल्लाका अधिकांश स्थानमा फाटफुट बाहेक तोरी खेतीमा गिरावट आएको किसानहरूले बताउनुभएको छ। तर, खप्तड छेडेदह गाउँपालिका–३ स्थित डोगडीमा भने यो वर्ष प्रशस्त तोरी खेती भएको छ ।

डोगडीका स्थानीय एवं डाक्टर भेसराज बुढाथोकीका अनुसार, यस वर्ष समयमै वर्षा भएकाले तोरीको उत्पादन राम्रो भएको छ । किसानहरूले खेतभरि हरियो तोरीका बोट फुलेका देख्दा हर्ष व्यक्त गरेका छन् । अहिले तोरी फल्ने तयारीमा छ, जसको फुलले गाउँका बारी पहेँलो र मनमोहक देखिएका छन् ।

जिल्लाभरि तोरी खेती घट्दै गए पनि डोगडीका किसानहरूले परम्परागत तिरी खेतीलाई निरन्तरता दिँदै आएका छन् । स्थानीय कृषक पवित्रा विकले “तोरीले घरको तेलको आवश्यकता पुरा गर्छ, त्यसैले हामीले खेती गर्न नछाडेको बताउनुभयो ।

कृषि ज्ञान केन्द्र बाजुराका अनुसार जिल्लामा पछिल्ला वर्षहरूमा मकै, गहुँ ,कोदो र फलफूलमा किसान आकर्षित भइरहेका भए पनि तोरी खेती उत्पादनको क्षेत्रफल भने घटेको छ । तर डोगडीमा अझै पनि स्थानीय जातका तोरीको उत्पादन राम्रो मात्रामा भइरहेको छ, जसले गाउँको पहिचान नै तोरी उत्पादन क्षेत्रका रूपमा बनाइरहेको छ ।

गाउँ-गाउँमा सहरको आयातित तेल छ्यापछ्याप्ती पाईने भएकै कारण स्थानीय तोरी खेतीतर्फ लाग्न छोडेको सरोकारवालाको बुझाइ रहेको छ। स्वास्थ्यका हिसाबले निकै लाभदायक मानिने तोरीको उत्पादन घट्नुलाई चिन्ताको विषयका रुपमा लिइएको छ।