ऊर्जा उज्यालो मात्र होइन, समृद्धिको आधार पनि हो :मन्त्री खड्का

काठमाडौँ । ऊर्जा, जलस्रोत तथा सिँचाइ मन्त्री दिपक खड्काले अब भाषण मात्र गरेर होइन, जनताको अपेक्षाअनुसार छिटो र प्रभावकारी काम गरेर परिणाम देखाउने बेला आएको बताउनु भएको छ ।

विद्युत् विकास विभागको ३२औँ वार्षिकोत्सवको अवसरमा आयोजित विशेष समारोहलाई प्रमुख अतिथिको आसनबाट सम्बोधन गर्नुहुँदै मन्त्री खड्काले भन्नुभयो, हामीले भाषण धेरै गर्‍यौँ, अब साँच्चिकै काम गर्ने समय हो। यदि नीति र नियमले काम रोकिएको छ भने तिनमा सुधार गरेर भए पनि अघि बढ्नुपर्छ। ऊर्जा अब केवल उज्यालो दिने माध्यम होइन, यो मुलुकको समृद्धिसँग गाँसिएको विषय हो ।

मन्त्री खड्काले देशभरको हरेक चुल्होमा विद्युत् पुगोस् भन्ने सरकारको लक्ष्य रहेको उल्लेख गर्दै, ऊर्जाको आवश्यकता रोकिने विषय होइन, ढिलाइ नगरौँ, आवश्यक निर्णयहरू तत्काल लिई तीव्र गतिमा अघि बढौँ, भन्ने धारणा राख्नुभयो।

मन्त्री खड्काले वर्तमान सरकारको प्राथमिकता देशको समृद्धि साझेदारीको आधारमा सुनिश्चित गर्नू रहेको उल्लेख गर्दै भन्नुभयो, हामीसँग जे छ, त्यसको सदुपयोग गर्न सक्ने हो भने, ऊर्जा नै व्यापार र समृद्धिको मूल स्रोत बन्न सक्छ।

उहाँले थप्नुभयो, AI (कृत्रिम बौद्धिकता) को युगमा प्रवेश गरिसकेका छौँ, यो युग चलाउन ऊर्जा अनिवार्य छ। त्यसैले हामीले उत्पादन मात्र होइन, प्रसारण र वितरणतर्फ पनि विशेष ध्यान दिनुपर्छ ।

ऊर्जा मन्त्री खड्काले जमिन अधिग्रहण, प्रसारण लाइन विस्तार र संरचनागत अड्चनलाई हटाउन नीति–नियमको पुनरावलोकन गर्ने स्पष्ट सङ्केत दिनुभयो। उहाँले निजी क्षेत्रको योगदानलाई समेत मूल्याङ्कन गर्दै भन्नुभयो, सरकार र निजी क्षेत्रको सहकार्यले मात्रै स्थायित्व र प्रभावकारिता आउँछ ।

यो वर्ष ४३२ मेगावाट जलविद्युत् तथा ३५ मेगावाट सौर्य ऊर्जा उत्पादन गरेर योगदान दिने निजी तथा सरकारी पक्षप्रति धन्यवाद ज्ञापन गर्दै मन्त्री खड्काले भन्नुभयो, मुलुकको समृद्धि सरकार वा मन्त्री मात्रको दायित्व होइन, यो साझा प्रयास हो। त्यसैले सबै तह र तप्काले आफ्नो जिम्मेवारी निर्वाह गर्नुपर्छ।

उहाँले समस्या छ भने पहिचान गरौँ, अप्ठ्यारा छन् भने तिनको समाधान गरौँ, अब समय गुमाउने होइन, सम्भावनालाई काममा बदल्ने हो भन्ने प्रेरणादायी सन्देश पनि दिनुभयो।

ऊर्जा मन्त्रालय अन्तर्गतको विद्युत् विकास विभागले आयोजना गरेको ३२ औँ वार्षिकोत्सव समारोहमा ऊर्जा मन्त्रालयका सचिवहरू सुरेश आचार्य एवं सरिता दवाडी, ऊर्जा तथा जलस्रोत आयोगको सचिवालयका प्रमुख सचिव दिनानाथ मिश्र, विद्युत् नियमन आयोगका अध्यक्ष डा। रामप्रसाद धिताल, नेपाल विद्युत् प्राधिकरणका कार्यकारी निर्देशक हितेन्द्रदेव शाक्य, स्वतन्त्र विद्युत् उत्पादकहरूको संस्था इप्पानका वरिष्ठ उपाध्यक्ष मोहन डाङ्गी, सल्लाहकार, विभागीय प्रमुखहरू, विभिन्न विद्युत् कम्पनीका प्रतिनिधिहरू, निजी क्षेत्रका अग्रज तथा विशेषज्ञहरूको उपस्थिति रहेको थियो।

विद्युत् विकास विभागका महानिर्देशक नवीन राज सिंहको अध्यक्षतामा सम्पन्न सो समारोहमा विद्युत् विकास विभागले प्रकाशन गरेको ‘विद्युत् प्रवर्द्धन स्मारिका -२०८२’ लाई प्रमुख अतिथि ऊर्जामन्त्री दिपक खड्काले विमोचन गर्नु भयो । कार्यक्रममा सेवानिबृत कर्मचारीहरू मधु प्रसाद भेटवाल (सचिव पदबाट अवकाश), अरुण कुमार झा (उपमहानिर्देशकबाट अवकाश) र सरिता प्रधानलाई सम्मान गरिएको थियो । त्यसैगरी आर्थिक वर्ष २०८१/०८२ मा निर्माण सम्पन्न गरेका २० वटा विद्युत् आयोजनाहरूका प्रवर्द्धकहरूलाई सम्मान गरिएको थियो ।