शाक्यको ‘करुणा’ माथि धुलिखेलमा विमर्श

काभ्रेपलाञ्चोक । प्रधानमन्त्री केपी शर्मा ओली पत्नी राधिका शाक्यद्वारा लिखित ‘करुणा’ आत्मकथामाथि आज काभ्रेपलाञ्चोकको धुलिखेलमा विमर्श गरिएको छ । 

कार्यक्रमका वक्ताहरूले करुणामा प्रस्तुत जीवन भोगाइका फरक फरक विषयले मानव जीवनको सबै विषयमा करुणा झल्किएको विचार व्यक्त गरे । 

धुलिखेल नगरपालिका प्रमुख अशोक ब्याञ्जूले करुणा आत्मकथामाथि कविताको माध्यमबाट प्रतिक्रिया दिँदै करुणा अनन्त कथा–व्यथाको सागर रहेको उल्लेख गर्नुभयो । 

मानव सेवा आश्रमका अध्यक्ष रामजी अधिकारीले करुणाले ‘तिम्रो छातीमा दया, माया, करुणा सबै छ, त्यसलाई नजिकबाट अनुभूत गर’ भनी झक्झकाउने तथा मानिसभित्रको इमान्दारिता, करुणा, माया, दयाको झल्को दिनाका साथै सत्यको पथमा अघि बढ्न प्रेरित गर्ने बताउनुभयो । 

उहाँले जीवनमा जन्मदिने आमाबुबा, पिता र पतिको महत्व, युवापुस्तालाई पठन संस्कृतिमा आकर्षण गर्न, देशको माटोप्रतिको प्रेमलाई अनूभूति हुने गरी प्रस्तुत गरिएको बताउनुभयो । 

करुणा विमर्शमा लेखक शाक्यले आफूले जीवनमा पञ्चायत, बहुदलीय प्रजातन्त्र, गणतन्त्र देखेको र महसुस गरेको कुरा तथा देशको अवस्थालाई वर्तमान युवा र आगामी पुस्तालाई जानकारी दिने उद्देश्यले आत्मकथा लेखेको बताउनुभयो । उहाँले आफ्ना श्रीमान् प्रधानमन्त्री ओलीकै प्रेरणाले आत्मकथा लेख्न सफल भएको बताउनुभयो । 

“प्रधानमन्त्री अर्थात् श्रीमान् केपी शर्मा ओलीले सधैँ  घरको काममा मात्रै व्यस्त नहुन र आफूभित्रको क्षमता चिनेर लेख्न केही लेख्न भनेर प्रेरणा दिनुभयो । त्यही प्रेरणाका कारणले आत्मकथा लेख्न प्रेरित भएको हुँ”, शाक्यले भन्नुभयो । 

उहाँले आत्मकथामा आफ्ना ‘दुःख र सङ्घर्ष’को चित्रण गरिएको उल्लेख गर्नुभयो । करुणा आत्मकथाको गत फागुन ११ गते प्रधानमन्त्री केपी शर्मा ओलीलगायतले काठमाडाँैमा विमोचन गर्नुभएको थियो ।