बूढो उमेर भएका सल्लाका रुख काटेर नयाँ रुख रोप्ने योजनाका साथ लहरेखोला जलुके सामुदायिक वन समूह जुटेको छ । जिल्लाको शिवालय गाउँपालिका–१ स्थित लहरेखोला सामुदायिक वनमा अहिले दर्जनौँ सल्लाका रुख काटेर नयाँ बिरुवा रोप्ने अभियान शुरु भएको वडा नं १ का अध्यक्ष मानबहादुर पुनले बताउनुभयो ।

दिगो वन व्यवस्थापन तथा पूर्ण उत्पादन कार्यक्रमअन्तर्गत सो रूख काटिएको उहाँले बताउनुभयो । पुराना, बूढा भएका रुख काटेर समूहको आम्दानी गरी नयाँ रुख रोप्ने अभियान शुरु गरिने उहाँले जानकारी दिनुभयो । जङ्गलमा रुख कुहिएर खेर जाने भएकाले त्यसलाई सहीरूपमा व्यवस्थापन गरी आम्दानीको मुख्य आधार खोजिन लागिएको हो । अहिले रुख काटेर छेडा–मोर्क हुँदै शिवालय कचाली सडकमा राखिएको छ ।

सामुदायिक वनले डिभिजन वनसँग समन्वय गरेर काठ बिक्रीका लागि पहल शुरु हुन लागेको छ । काठ बिक्रीका लागि सार्वजनिक सूचना प्रकाशित गरेर प्रतिस्पर्धाका आधारमा काठ बिक्री गरिने भएको छ । दिगो वन व्यवस्थापन भन्दै जथाभावी रुख काटेको आरोपसमेत स्थानीयवासीले लगाएका छन् । रुखबाट भएको आम्दानीले सामुदायिक वनकै वृद्धि, विकासका लागि खर्चिने उपभोक्ता समितिका सदस्य रामबहादुर पुनले बताउनुभयो ।

दिगो विकासको नाममा उपभोक्ता समिति मोटाउने ख्याल नहोस् भनी स्थानीयवासीले खबरदारीसमेत गरिरहेको स्थानीयवासीको भनाइ छ । यहाँका चार सामुदायिक वनमा अघिल्लो वर्षदेखि उक्त कार्यक्रम लागू भएको हो । स्थानीयवासीले रुख मात्र काटेको जानकारी रहेपनि नयाँ रुख कहिले रोपिन्छ भन्ने पत्तो नभएको बताएका छन् ।

दिगो वन व्यवस्थापन गर्नका लागि विभिन्न मापदण्ड लागू गरेर मात्र काम गर्नुपर्नेमा डिभिजन वन कार्यालयको जोड छ । बूढा तथा माउ रुख एकैपटक नकाटी मापदण्ड बनाएर वर्षेनी सङ्ख्या निर्धारण गरी कटान गरिने डिभिजन वन कार्यालयले जनाएको छ ।

एकै छानाबाट तीन सेवा

छुट्टाछुट्टै कार्यालय रहेर विकेन्द्रीकरण सेवा दिँदै आएका स्वास्थ्य कार्यालय एकीकरण गरेसँगै एकै छानाबाट सेवा प्रवाह शुरु भएको छ । कर्णाली प्रदेश सरकारले जिल्ला अस्पताल, आयुर्वेद स्वास्थ्य केन्द्र र स्वास्थ्य कार्यालयलाई एकीकृत गरी एकै छानामा राखेपछि सेवाप्रवाह छिटो, छरितो भएको हो ।

स्वास्थ्यसँग सम्बन्धित यी तीन कार्यालय एकै ठाउँ र एकै कार्यालयबाट सञ्चालन भएपछि स्वास्थ्यकर्मीलाई पनि सेवाप्रवाह र अनुभव आदान–प्रदानमा महत्वपूर्ण भूमिका खेलेको निमित्त स्वास्थ्य सेवा व्यवस्थापक डा रविन भुषालले जानकारी दिनुभयो ।

पछिल्लो समयमा सेवा प्रवाहमा चुस्त बन्दै आएको स्वास्थ्य सेवा अहिले एकीकरणले बिरामीलाई राम्रो भएको स्वास्थ्य सेवा कार्यालय विकास समितिका अध्यक्ष धर्मशिला बस्नेतले बताउनुभयो । कार्यालय एकीकरणसँगै भाडामा रहेको आयुर्वेद कार्यालय सरकारी कार्यालयमा सरेको छ । नयाँ निर्माण भएका भवनबाट स्वास्थ्य कार्यालयले सेवाप्रवाह गर्न थालेको छ । केही महीनाभित्र स्वास्थ्य सेवा कार्यालयको अत्याधुनिक भवन निर्माणकार्य शुरु हुने बताइएको छ । रासस