बुढीगण्डकी बाढी प्रभावित जिल्लाका प्रमुख जिल्ला अधिकारीसँग विपद् प्राधिकरणको छलफल

काठमाडौँ । गोरखाको बुढीगण्डकी नदीमा आएको बाढीबाट प्रभावित जिल्लाको अवस्था र आवश्यकताबारे विपद् प्रतिकार्य कमाण्ड पोष्टले सम्बन्धित प्रमुख जिल्ला अधिकारी तथा जिल्ला सुरक्षा समितिका सदस्यहरूसँग अनलाइन माध्यमबाट छलफल गरेको छ।

विपद् प्राधिकरणका कार्यकारी प्रमुख डा.धर्मराज उप्रेतीको अध्यक्षतामा भएको छलफलमा प्रभावित जिल्लाका प्रमुख जिल्ला अधिकारीहरूले बाढीबाट भएको क्षति, उद्धार तथा राहतको अवस्था र तत्काल आवश्यकताबारे जानकारी गराउनुभएको थियो।

यसअघि विपद् परिचालन टोलीको बैठकमा बाढीपछि सडक, पुल र विद्युत् पूर्वाधारमा भएको क्षति तथा तत्काल राहत र अवरुद्ध कनेक्टिभिटी पुनःस्थापनाका विषयमा छलफल भएको थियो।