काठमाण्डौ – १ मा रास्वपाका रञ्जु दर्शना विजयी

काठमाण्डौ । काठमाडौं जिल्ला निर्वाचन क्षेत्र नम्बर– १ मा राष्ट्रिय स्वतन्त्र पार्टीका उम्मेदवार रञ्जु दर्शना विजयी हुनुभएको छ । यसको औपचारिक घोषणा निर्वाचन आयोगले गर्न बाँकी छ ।

जम्मा २९ हजार ७ सय ७४ मतमध्ये राष्ट्रिय स्वतन्त्र पाार्टीका उम्मेदवार रञ्जु दर्शनाले १५ हजार ४ सय ५५ मत प्राप्त गरेको मुख्य निर्वाचन अधिकृत चुरामन खड्काले जानकारी दिनुभयो ।

यसैगरी, नेपाली काँग्रेसले ६ हजार ३ सय ३४, नेकपा एमालेले एक हजार ६ सय १८ र नेपाली कम्युनिष्ट पार्टीले तीन सय ४५ मत प्राप्त गरेको छ ।

प्रत्यक्षतर्फको मतगणना सकिएको भएपनि घोषणा हुन भने बाँकी रहेको मुख्य निर्वाचन अधिकृत खड्काले बताउनुभयो ।
समानुपातिक तर्फको मतगणना निरन्तर भइरहेको छ ।

न्यौपानेको राजनीतिक पृष्ठभूमिः

वैकल्पिक राजनीतिक धारको नेतृत्व गर्दै राजनीतिमा सक्रिय हुनुभएकी नेत्री न्यौपाने निर्वाचन अघि विवेकशील साझा पार्टीबाट रास्वपामा प्रवेश गर्नुभएको थियो ।

यसअघि २०७४ मा उहाँ २१ वर्षको उमेरमै काठमाडौँ महानगरपालिकाको प्रमुखको प्रत्यासी हुनुहुुन्थ्यो । उहाँ विवेकशील साझा पार्टीकी पूर्वमहासचिवसमेत हुनुहुन्थ्यो । उहाँले राजनीतिशास्त्र र परामर्श मनोविज्ञानमा स्नातकोत्तर गर्नुभएको छ ।

महिला हिंसाविरुद्ध स्पष्ट र सशक्त आवाज उठाउँदै आउनुभएकी न्यौपानेले थेम्स कलेजमा अध्यापक र निकोलसन इन्टरनेसनल कलेजमा अतिथि प्राध्यापकको भूमिकासहित सामाजिक शिक्षा विषय विशेषज्ञका रुपमा अनुभव बटुल्नुभएको छ ।

सूचनाको हक, अभिव्यक्ति स्वतन्त्रता र नागरिक अधिकारको पक्षधर उहाँ सामाजिक अभिन्ताका रुपमा परिचित हुनुहुन्छ ।