वीरगंज भन्सारद्वारा ७ महिनामा १ खर्ब ३५ अर्ब राजस्व सङ्कलन, लक्ष्यभन्दा १८ अर्ब कम

वीरगंज। देशकै मुख्य भन्सार नाकाको रूपमा रहेको बीरगंज भन्सार कार्यालयले चालु आर्थिक बर्ष २०८२/०८३ को ७ महिनाको अबधिमा १ खर्ब ३५ अर्ब ४८ करोड राजस्व असुली गरेको छ । 

अर्थ मन्त्रालय भन्सार विभागले वीरगंज भन्सार कार्यालय (आईसीपी) लाई माघ मसान्त सम्म ७ महिनाको लागी १ खर्ब ५३ अर्ब ८४ करोड राजस्व सङ्कलन गर्ने लक्ष्य तोकेको भए पनि सो समयमा भएका विभिन्न आन्दोलन, बर्षायामको कारण भन्सार प्रभावित हुनुको साथै माल सामानको आयात समेत घटेको हुँदा लक्ष्य अनुसारको राजस्व असुली प्रभावित भएको वीरगंज भन्सार कार्यालय (आईसिपी) का प्रमुख भन्सार प्रशासक कृष्ण प्रसाद मैनालीले जानकारी दिनुभयो । 

आईसिपी बीरगंजले ७ महिनाको अबधिमा तोकिएको लक्ष्य भन्दा झन्डै १२ प्रतिशत कम राजस्व असुली गरेको छ । 

अर्थ मन्त्रालयले तोकेको लक्ष्य भन्दा ७ महिनामा १८ अर्ब ३६ करोड ४९ लाख ५३ हजार कम राजस्व असुली भएको बीरगंज भन्सार कार्यालयले सार्वजनिक गरेको तथ्याङ्कमा उल्लेख छ ।  

देशकै दुई ठूला भन्सार कार्यालय वीरगन्ज भन्सार कार्यालय र सिर्सिया सुक्खा बन्दरगाह भन्सार कार्यालय गाभिएको ७ महिनाको अबधिमा आईसिपी भन्सारले सो परिमाणमा राजश्व सङ्कलन गर्न सकेको प्रमुख भन्सार प्रशासक मैनालीले बताउनुभयो । 

प्रमुख भन्सार प्रशासक मैनालीले पेट्रोलियम पदार्थको आयातमा कमी र वर्षा याम, डुबानको कारण पनि राजश्व असुली लक्ष्य भेट्टाउन नसकिएको बताउँदै गत आर्थिक वर्षको ७ महिनाको अवधिमा भन्दा भन्दा चालु आवको ७ महिनामा भने बढी राजश्व सङ्कलन गर्न सफलता मिलेको जानकारी दिनुभयो । 

गत आर्थिक बर्ष २०८१/०८२ को ७ महिनाको अबधिमा  यस भन्सारले १ खर्ब २१  अर्ब ४२ करोड २ लाख ८२ हजार रुपैयाँ राजश्व सङ्कलन गरेको थियो । सो अबधिमा अर्थ मन्त्रालय भन्सार विभागले १ खर्ब ४९ अर्ब ७२ करोड ६३ लाख २७ हजार रुपैयाँ राजश्व सङ्कलन गर्ने लक्ष्य तोकिएको थियो ।

वीरगन्ज भन्सारले गतबर्षको ७ महिनाको तुलनामा चालु आर्थिक वर्ष ०८२/०८३ को ७ महिनाको अबधिमा १४ अर्ब १६ करोड ८१ लाख ८१ हजार बढी राजस्व सङ्कलन गर्न सफल भएको छ । 

चालु आर्थिक वर्ष ०८२/०८३ मा वीरगंज भन्सारलाई अर्थ मन्त्रालयबाट  २ खर्ब ७३ अर्ब ३९ करोड ४८ लाख रुपैयाँ राजश्व सङ्कलनको लक्ष्य दिइएको वीरगंज भन्सारका प्रमुख भन्सार प्रशासक कृष्ण प्रसाद मैनालीले जानकारी दिनुभयो ।  

यता चालु आर्थिक वर्ष ०८२/०८३ को माघ महिनामा मात्रै अर्थ मन्त्रालय भन्सार विभागले वीरगंज भन्सार कार्यालय (आईसीपी) लाई २१ अर्ब २९ करोड ४६  लाख ४९ हजार रुपैयाँ राजश्व असुलीको  लक्ष्य तोकेकोमा १८ अर्ब ९० करोड ९ लाख ७८ हजार रुपैयाँ राजश्व असुली भएको प्रमुख भन्सार प्रशासक कृष्ण प्रसाद मैनालीले बताउनुभयो । 

माघ महिनामा बीरगंज भन्सारले तोकिएको लक्ष्यको ८८ दशमलव ७९ प्रतिशत राजस्व असुली गरेको प्रमुख भन्सार प्रशासक मैनालीले  जानकारी दिनुभयो ।