रेडियो नेपालमा निर्वाचन लक्षित समावेशी कार्यक्रम उत्पादन सम्बन्धी प्रशिक्षण सुरु

काठमाडौँ। सार्वजनिक सेवा प्रसारण रेडियो नेपालमा समावेशी प्रसार सामग्री उत्पादन तथा प्रसारण सम्बन्धी दुई दिने प्रशिक्षण कार्यक्रम आजदेखि सुरु भएको छ ।

प्रशिक्षण कार्यक्रममा रेडियो नेपाल सिंहदरबारमा कार्यरत समाचार तथा कार्यक्रममा संलग्न प्रसारक, सम्पादक, सम्वाददाता र बागमती प्रदेशका जिल्लाहरूका स्थानीय संवाददाताहरू सहभागी रहेका छन् ।

प्रशिक्षण कार्यक्रममा सार्वजनिक सेवा प्रसारण नेपालका कार्यकारी अध्यक्ष डाक्टर महेन्द्र विष्टले विभिन्न राष्ट्र भाषाको आ–आफ्नै मौलिकता र विशेषता रहेकाले त्यसलाई प्राथमिकता दिई प्रसारण सामग्रीलाई प्रभावकारी बनाउनुपर्नेमा जोड दिनुभयो ।

अध्यक्ष विष्टले फागुन २१ गते हुन गइरहेको आम निर्वाचन समावेशिता र लोकतन्त्रका लागि महत्त्वपूर्ण भएकोले रेडियो नेपाल र नेपाल टेलिभिजनले समावेशितामा आधारित कार्यक्रम र समाचारमार्फत आम मतदातालाई जागरूक बनाउनुपर्ने आवश्यकता औँल्याउनुभयो ।

सार्वजनिक सेवा प्रसारण नेपालका कायममुकायम प्रमुख प्रशासकीय अधिकृत विष्णुराम न्यौपानेले निर्वाचन सम्बन्धी समाचार तथा कार्यक्रम समावेशिता र निर्वाचन आचार संहितालाई ध्यान दिँदै सन्तुलित र  निष्पक्ष हुनुपर्ने बताउनुभयो ।

प्रशिक्षण कार्यक्रममा सार्वजनिक सेवा प्रसारण नेपालका अध्यक्ष डाक्टर विष्ट, सञ्चालक समितिका सदस्यहरू डाक्टर भूमिराज चापागाईँ र अनिता गुरुङ, निर्वाचन आयोगका सूचना अधिकारी सुमन घिमिरे र रेडियो नेपालका उपनिर्देशक जनार्दन विष्टले समावेशी प्रसारणका विषय सामग्री, निर्वाचनमा समावेशिता, प्रसारण पत्रकारितामा समावेशिताको अवधारणा र निर्वाचनमा मतदाता शिक्षामा प्रसारण माध्यमको भूमिका विषयमा प्रशिक्षण दिनुहुने छ ।

कार्यक्रममा रेडियो नेपालका तालिम तथा कार्यक्रम प्रमुख तारा प्रसाद वस्तीले रेडियो नेपालले लामो समयदेखि समावेशिता विषयमा समाचार र कार्यक्रम उत्पादन र प्रसारण गर्दै आइरहेको र प्रशिक्षणबाट विषय सामग्रीको चयन र उत्पादनमा थप मद्दत पुग्ने बताउनुभयो ।

तस्वीर: मिलन ढुङ्गाना