वीरगन्ज महानगरको १९ औँ नगर अधिवेशन सम्पन्न

वीरगञ्ज । वीरगन्ज महानगरपालिकाको १९ औँ नगर अधिवेशन आज सम्पन्न भएको छ । 

अधिवेशनबाट यसअघि गएको असोजमा भएको विशेष अधिवेशनमा कटौती गरिएको वडाको २५ प्रतिशत बजेटलाई पुन थप गर्ने प्रस्ताव पारित भएको छ । 

गएको भदौ २३÷२४ गते जेन्जी आन्दोलनका कारण महानगरमा भएको क्षतिपछि असोजमा विशेष अधिवेशन भएको थियो । विशेष अधिवेशनले महानगरको सबै संरचनामा क्षति पुगेकाले पुननिर्माणलाई प्राथमिकतामा राख्दै वडाको समेत बजेट कटौती गरेको थियो । 

पुननिर्माणका लागि आवश्यक स्रोत जुटाउँदै चालु आर्थिक वर्षमा १७ औँ अधिवेशनले छुट्टाएको वडातर्फको बजेटलाई यथावत् रहने गरि अहिलेको अधिवेशनबाट पारित गरिएको महानगर प्रमुख राजेशमान सिंहले जानकारी दिनुभयो ।

उहाँले चालु आर्थिक वर्षको आजसम्म समग्र आय–व्ययको अवस्था समेत जानकारी गराउनु भएको थियो । अहिलेसम्म बिनियोजन गरिएको कुल तीन अर्ब २२ करोड रुपैयाँमध्ये १ अर्ब १३ करोड रुपैयाँ खर्च भएको पनि उहाँले जानकारी दिनुभयो । 

खर्चको प्रतिशत हेर्दा अहिलेसम्म विनियोजित बजेटको ३३ प्रतिशत खर्च भएको छ । चालु खर्च तर्फ ३४.७८ प्रतिशत र पूँजीगत खर्च तर्फ ३२.६४ प्रतिशत रहेको प्रमुख सिंहले जानकारी दिनुभयो । 

महानगरपालिकाले यसै आर्थिक वर्षभित्र शुलभ औषधी पसल, प्रयोगशाला विस्तार, नगर अस्पताल सञ्चालनमा ल्याउने लक्ष्य समेत राखेको छ । 

अधिवेशनमा उपप्रमुख इम्तियाज आलम, प्रमुख प्रशासकीय अधिकृत अरविन्द लाल कर्ण, ३२ वटै वडाका वडाध्यक्ष, वडा सदस्य लगायतको सहभागिता रहेको थियो ।