मिथिला नाट्यकला परिषद् द्वारा अत्याधुनिक नाटक घरको निर्माण 

जनकपुरधाम । मिथिला नाट्य कला परिषद्ले जनकपुरधाममा आफ्नै नाटक घरको निर्माण गरेको छ । 

परिषद्ले जनकपुरधाम उपमहानगरपालिकाको वडा नंं ४ मा करिब २ करोडको लागतमा नाटक घरको निर्माण गरेको हो ।  

नेपालकै पुरानो नाट्य संस्था मध्ये एक रहेको मिथिला नाट्यकला परिषद्को सो नाटक घरमा ३ सय दर्शक अटाउने क्षमता भएको परिषद्का अध्यक्ष परमेश झाले जानकारी दिनुभयो । 

दैनिक रूपमा नाटक मञ्चन गर्ने उद्देश्यले साथ नाटक घरको निर्माण गरिएको परिषद्ले जनाएको छ । 

मङ्सिर १५ गते मैथिलीका प्रसिद्ध नाट्य लेखक महेन्द्र मलंगीयत तथा वरिष्ठ साहित्यकार डा.राजेन्द्र प्रसाद विमलले संयुक्त रूपमा नवनिर्मित नाट्य घरको उद्घाटन गर्नुहुन परिषद्ले जनाएको छ । 

हाल परिषद्सँग राष्ट्रिय तथा अन्तर्राष्ट्रिय क्षेत्रमा ख्याति कमाएका ७० जना कलाकारहरू आबद्ध रहनुभएको छ ।  जसमध्ये २२ देखि २५ जना महिला कलाकारहरू मात्र रहेको परिषद्का अध्यक्ष झाले जानकारी दिनुभयो । 

नेपालमा रहेका सरकारी बाहेकका नाटक घर मध्ये ठूला नाटक घरको रूपमा मिथिला नाट्यकला परिषद्को नाटक घरको निर्माण भएको जनाएको छ । 

नाटक घरको सञ्चालनले मिथिलाको नाटक क्षेत्रको विकासमा थप मद्दत पुग्नुका साथै कलाकारलाई जीविकोपार्जनमा ठुलो मद्दत पुग्ने विश्वास परिषद्को छ । जनकपुरधामको मुटुमा नै निर्माण भएको नाटक घरमा नियमित रूपमा विभिन्न नाटकहरू मञ्चन गर्ने योजना परिषद्को छ । 

२०३६ सालमा स्थापना भएको मिथिला नाट्य कला परिषद्को नाटक घरको निर्माणमा विभिन्न सरकारी संस्था, निकाय तथा व्यक्तिहरूको सहयोग रहेको परिषद्ले जनाएको छ ।