रौतहट क्षेत्र नं–४ मा एमाले प्रतिनिधि छनौटको मतदान जारी , ५० प्रतिशतभन्दा बढी मत खस्यो

रौतहट । नेकपा (एमाले) को ११औँ राष्ट्रिय महाधिवेशनका लागि प्रतिनिधि छनौट प्रक्रियाअन्तर्गत रौतहट क्षेत्र नम्बर ४ मा आज जारी मतदान तीव्र गतिमा भइरहेको छ। जिल्लाका चारमध्ये तीन निर्वाचन क्षेत्रमा सर्वसम्मत प्रतिनिधि चयन भइसकेको भए पनि क्षेत्र नम्बर ४ मा सहमति नजुटेपछि मतदानमार्फत प्रतिनिधि छान्ने प्रक्रिया अघि बढेको एमाले रौतहटका सचिव बाबुराम दाहालले जानकारी दिनुभयो।

निर्वाचन समितिका संयोजक किशोर उपाध्यायका अनुसार कुल १७ सय मतदातालाई लक्षित गरी बिहान १० बजेदेखि साँझ ४ बजेसम्म मतदान जारी रहेको छ। उहाँका अनुसार दिउँसो २ बजेसम्म ५० प्रतिशतभन्दा बढी मतदान भइसकेको र मतदाताको भीड अझै बढ्दो क्रममा रहेको छ।

महिला क्लस्टरमा मुन्ना सुवेदी, शकुन्तला कुमारी, रिता कार्की र सीता राणा मगरबीच प्रतिस्पर्धा तीव्र बनेको छ। खुला समूहमा अशोक पहाडी, शिवप्रसाद आचार्य, खड्कबहादुर बम्जन, एन पोखरेल, रामजी साह, वैद्यनाथ सहनी, सुरेश यादव र टंकेश्वर चौधरी गरी आठ उम्मेदवार दर्ता भई प्रतिस्पर्धामा उत्रिएका छन्।

त्यस्तै, युवा क्लस्टरमा रवि राणा मगर र शम्भु खड्काबिच दुईजनाको प्रत्यक्ष प्रतिस्पर्धा रहेको निर्वाचन समितिले जनाएको छ। क्षेत्र नं.४ मा चालु मतदानबाट खुला समूहबाट दुई, महिला समूहबाट दुई र युवा समूहबाट एक गरी पाँच प्रतिनिधि चयन गरिनेछ।

सहमति जुटाउने प्रयास अन्तिमसम्म जारी रहे पनि अन्ततः सहमति नजुटेपछि मतदान अपरिहार्य बनेको एमाले जिल्ला सचिव दाहालले बताउनुभयो। मतदान स्थलहरूमा शान्ति सुरक्षा, व्यवस्थापन र निष्पक्षता सुनिश्चित गर्न पर्याप्त सङ्ख्यामा सुरक्षाकर्मी परिचालन गरिएको संयोजक उपाध्यायले बताउनुभयो।

मतदान सकिए लगत्तै मतगणना सुरु हुने र चयन भएका प्रतिनिधिहरू आगामी ११औँ महाधिवेशनमा रौतहटको तर्फबाट सहभागी हुने निर्वाचन समितिले जनाएको छ।