मधेसमा सामाजिक सुरक्षाको दायरा बढाउनुपर्नेमा जोड 

जनकपुरधाम । मधेस प्रदेशमा सामाजिक सुरक्षाको दायरा बढाउनुपर्नेमा सरोकारवालाहरूले जोड दिनुभएको छ । 

आठौँ सामाजिक सुरक्षा दिवसको अवसरमा आज जनकपुरधाममा आयोजना गरिएको कार्यक्रमका सहभागीहरूले सामाजिक सुरक्षाको दायरा बढाउनमा रोजगारदाताहरूले सहयोग गर्नुपर्नेमा जोड दिनुभयो ।

कार्यक्रममा मधेस प्रदेशका खानेपानी, ऊर्जा तथा सिँचाइ मन्त्री लखनदास तत्माले सामाजिक सुरक्षाको कार्यक्रम निक्कै राम्रो रहेकाले यसको दायरा मधेस प्रदेशमा बढाउनका लागि प्रदेश सरकारले सहयोग गर्ने बताउनुभयो । 

उहाँले कुनै पनि समाजलाई अगाडी बढाउनका लागि शिक्षा, स्वास्थ्य, सामाजिक सुरक्षा र समानता आवश्यक रहेको उल्लेख गर्नुहुँदै मधेस प्रदेशमा थोरै सङ्ख्यामा सामाजिक सुरक्षाको दायरामा समेट्नु चिन्ताको विषय भएकोले सबै मिलेर यसको महत्वबारेमा जानकारी दिँदै दायरा बढाउन जरुरी रहेको बताउनुभयो । 

उद्योग, वाणिज्य तथा आपूर्ति मन्त्रालयका सचिव जय कुमार घिमिरेले सामाजिक सुरक्षा कार्यक्रम निक्कै महत्त्वपूर्ण भएकाले यसमा छुटेका श्रमिकहरूलाई ल्याउन जरुरी रहेको बताउनुभयो । 

सामाजिक सुरक्षा कार्यालय मधेस प्रदेशका प्रमुख कैलाश यादवले मधेस प्रदेशका २२ संस्थाका ३१ हजार ७ सय ७५ जना श्रमिक सामाजिक सुरक्षा दायरामा समेटिएको बताउनुभयो । मधेस प्रदेशमा धेरै रोजगारदाता संस्थाहरू भए पनि सामाजिक सुरक्षामा आबद्ध हुने संस्था ज्यादै थोरै भएको उहाँ बताउनुभयो ।