तालाबन्दीका कारण सुर्नयामा स्वास्थ्य सेवा प्रभावित

बैतडी। बैतडीको सुर्नया गाउँपालिकामा लामो समयसम्म तालाबन्दी हुँदा स्वास्थ्य क्षेत्र प्रभावित बनेको छ ।

पालिका अन्तर्गतका स्वास्थ्य संस्थाहरूमा औषधि अभाव भएको सम्बन्धित स्वास्थ्य चौकीले जनाएका छन् । 

स्वास्थ्य संस्थामा सिटामोल, बिटाडिन, जीवनजल लगायतका अत्यावश्यक औषधिको अभाव भएको सुर्नया–३ स्थित बाशुलिङ्ग स्वास्थ्य चौकीका इन्चार्ज दल बहादुर बिष्टले जानकारी दिनुभयो । औषधीको अभावमा सामान्य चोटपटक लागेकाहरूलाई उपचार गर्न पनि सकिने अवस्था नरहेको उहाँले बताउनुभयो । संस्थामा औषधी नहुँदा सेवाग्राहीलाई रित्तो हात फर्काउनु परेको स्वास्थ्य चौकी इन्चार्ज बिष्टले बताउनुभयो ।

स्वास्थ्य चौकीमा सामान्य सामाग्रीको पनि उपलब्ध नहुँदा सुत्केरी सेवा समेत प्रभावित हुने अवस्था आएको बाशुलिङ्ग स्वास्थ्य चौकीका ल्याब असिस्टेन्ट नरेन्द्र सिंह बिष्टले बताउनुभयो । 

गाउँपालिकाका स्वास्थ्य संयोजक राम सिंह महराले गाउँपालिका अन्तरगतका स्वास्थ्य चौकीहरूबाट औषधी लगायतका स्वास्थ्य उपकरणको अभाव हुन थालेको बताउनुभयो । 

गाउँपालिकाले स्वास्थ्य उपकरण सहितका औषधी आपूर्तिको लागि टेन्डर आह्वान गरिएको तर तालाबन्दीका कारण ठेक्का सम्झौता गरी औषधी खरिदको प्रक्रिया अघि बढाउन नसकिएको स्वास्थ्य शाखा प्रमुख महराले बताउनुभयो । 

स्वास्थ्य जस्तो अत्यावश्यक सेवा प्रभावित भइरहेको बताउँदै स्वास्थ्य शाखा प्रमुख महराले यथाशीघ्र सहमति गरी पालिकामा सहज वातावरण सिर्जना गर्न आग्रह गर्नुभयो । 

सूचना उपलब्ध नगराएको भन्दै गत असोज २४ गते जेनजी समूहका युवाहरूले गाउँपालिकाको कार्यालयमा तालाबन्दी गरेका थिए। त्यसयता आजसम्म सो ताला खुल्न सकेको छैन ।