डोम समुदायलाई छठका सामग्री निर्माण गर्न भ्याई नभ्याई

वीरगञ्ज । छठ पूजालाई आवश्यक पर्ने पूजा सामग्री निर्माणका लागि बारा पर्साका डोम समुदायलाई भ्याई नभ्याई छ । 

गरिब तथा विपन्नताको कारण सधैँ प्रभावित डोम समुदायलाई  खान, लाउन धौधौ हुने गर्दछ । अहिले भने यो जातिको मुहारमा हाँसो र मनमा उल्लास छाएको छ । 

डोम समुदायलाई अहिले छठ पर्व नजिकिँदै जाँदा बाँस र बेतका चोयाबाट डालो, नाङ्लो र टपरी बनाउन भ्याइ नभ्याई भएको छ । 

दीपावली लगत्तै सुरु हुने छठ पर्वलाई लक्षित गरी पर्सा लगायत तराई मधेसको विभिन्न स्थानमा बसोबासो गर्ने डोम समुदाय बाँसजन्य पूजा सामग्री बनाउँदै बेच्दै आएका छन् । पुर्ख्यौली पेसाबाट राम्रो आम्दानी भइरहेको वीरगन्ज जेलरोडका तेजुलाल डोम चमारले बताउनुभयो । 

बाँसबाट बनाइने नाङ्लो, ढकिया र कोनियाँ छठ पर्वमा अनिवार्य प्रयोग गर्ने भएकाले दुई महिनाअघिदेखि बनाएर भण्डारण गरेका सामग्री बेचेर नपुग्ने भएपछि बनाउँदै बेच्दै  गर्दैमा फुर्सद नरहेको उनीहरू बताएका छन् । अहिले प्रतिनाङ्लो बाँसको चोयाअनुसार सात सय रुपैयाँदेखी पाँच सय रुपैयाँ सम्ममा बिक्री भइरहेको उनीहरूले बताएका छन् ।

डोम समुदायले प्रत्येक छठमा व्रत बस्नेहरूका लागि तयार गर्ने बासका सामाग्री बेचेर राम्रो आम्दानी गर्दै आएको वीरगन्ज रानिघाट निवासी हरेन्द्र डोमले बताउनुभयो । 

छठ पर्व मनाउन तथा सूर्यदेवलाई बाँस र बेतबाटै बनाइएका डालो, नाङ्लो र टालु टपरीमा अर्घ्य दिनुपर्ने भएकाले प्रत्येक परिवारमा पाँच–सात वटा बाँसका सामग्री खरिद गर्नु पर्ने हुँदा डोम समुदायको व्यवसाय छठ पर्वमा फस्टाउने गरेको छ ।