विपद प्रभावित इलाममा प्रमुख जिल्ला अधिकारी र सुरक्षा प्रमुखको सक्रिय अनुगमन

इलाम । हालैको बाढीपहिरो र अन्य प्राकृतिक विपद्ले प्रभावित इलाम जिल्लामा प्रमुख जिल्ला अधिकारी सुनिता नेपाल र सुरक्षा प्रमुखले व्यक्तिगत रूपमा जिल्लाभरि पुगेर प्रभावितको अवस्था अवलोकन गर्नुभएको छ। उहाँहरूले तत्काल आवश्यक कदम चाल्न र प्रभावित क्षेत्रको वास्तविक अवस्था बुझ्न स्थानीय तहसँग समन्वय गर्दै सक्रिय रूपमा काम गर्नुभएको छ।

नेपाल सरकारको निर्णयअनुसार, इलामलाई आगामी तीन महिना लागि सङ्कटग्रस्त (सङ्कटग्रस्त) क्षेत्र घोषणा गरिएको छ, जसअनुसार तत्काल उद्धार, राहत वितरण र पूर्वाधार पुनःस्थापना कार्यलाई प्राथमिकता दिइएको छ।

विपद व्यवस्थापन सम्बन्धी छलफल इलाम, देउमाई, माई र सूर्योदय नगरपालिका तथा फाकफोकथुम, माङसेबुङ, फाल्गुनन्द, माइजोगमाई र रोङ गाउँपालिकामा सम्पन्न भएको छ। छलफलमा प्रमुख जिल्ला अधिकारीको सक्रिय नेतृत्व र सुरक्षा प्रमुखको सहयोगले प्रभावकारी कार्यान्वयनमा महत्वपूर्ण योगदान पुर्याएको उल्लेख गरिएको छ।

स्थानीय तहका प्रतिनिधिहरूसँग प्रत्यक्ष अन्तरक्रियामा रहेका अधिकारीहरूले तत्काल उद्धार र राहत कार्यलाई छिटो कार्यान्वयन गर्ने प्रतिबद्धता व्यक्त गर्नुभएको छ।

प्रमुख जिल्ला अधिकारी सुनिता नेपालले भन्नुभयो,“इलामलाई छिट्टै पूर्वावस्था वा पुरानो लयमा फर्काउने प्रयासमा हामी सक्रिय छौँ। यसमा सबै सरोकारवाला, स्थानीय सरकार र इलामवासीको साथ र सहयोग आवश्यक छ।”

स्थानीय तहको जनप्रतिनीधिहरुका अनुसार यस किसिमको समन्वय र अनुगमनले प्रभावित क्षेत्रका नागरिकहरूलाई सुरक्षित र छिटो राहत पुगाउन महत्वपूर्ण योगदान पुर्‍याउने विश्वास रहेको छ।