‘बलपूर्वक बेपत्ता भएका व्यक्तिको स्थिति छिटो सार्वजनिक गर्न सरकारसँग माग’

सुर्खेत । सशस्त्र द्वन्द्वका क्रममा बेपत्ता पारिएका त्यस्ता व्यक्तिका परिवारले सरकारसँग बेपत्ता भएका व्यक्तिको स्थिति छिटो सार्वजनिक गर्न माग गरेका छन् । 

छन् । नेपाल रेडक्रस सोसाइटी सुर्खेतले आज अन्तर्राष्ट्रिय बेपत्ता दिवस–२०२५ का अवसरमा सुर्खेतमा आयोजना गरेको कार्यक्रमका सहभागीले छानबिन आयोगले अहिलेसम्म बेपत्ता व्यक्तिको अवस्था सार्वजनिक नगरेको भन्दै सरकारमार्फत यथाशीघ्र बेपत्ता भएका व्यक्तिको स्थिति के हो भनेर जानकारी गराउन आग्रह गरेका हुन् । कर्णालीमा राज्य र विद्रोही पक्ष माओवादीबाट १ सय ११ जना बेपत्ता पारिएका थिए । 

वीरेन्द्रनगर–३, का ऐनबहादुर शाहीले जनयुद्धमा बेपत्ता पारिएका परिवारका आफन्तलाई यत्तिका वर्षसम्म पनि सरकारले बेपत्ता व्यक्तिको स्थिति सार्वजनिक नगर्दा यस्ता दिवसले थप पीडा दिने गरेको बताउनुभयो । कार्यक्रममा अहिले बेपत्ता भएका परिवारको बिचल्ली रहेको बताउँदै नेपाल रेडक्रस सोसाइटी कर्णाली प्रदेशका सभापति लीलाराम सुवेदीले कमाउने छोरा/छोरी मारिएपछि राज्यले उनीहरूको संरक्षणको जिम्मा लिँदै रोजगारी, शिक्षा, स्वास्थ्यको व्यवस्था गर्नुमा जोड दिनुभयो । 

जिल्ला समन्वय अधिकारी मेघनाथ सापकोटाले बेपत्ता पारिएका मानिसहरूको खोजविन जारी राख्दै उनका आफन्तका लागि विभिन्न सहुलियतपूर्ण कार्यक्रमहरू सञ्चालन गरिरहेको बताउनुभयो । 

कार्यक्रममा नेपाल रेडक्रस सोसाइटी सुर्खेतका सभापति रामलाल आचार्यले नेपाल रेडक्रस सोसाइटीले सरकार र पीडित पक्षबिच पुलको काम गर्दै पीडितहरूलाई सत्य कुरा थाहा पाउने, न्याय पाउने र परिपूरण पाउने हकका लागि वकालत गर्दै आइरहेको जनाउनुभयो ।