राष्ट्रियसभा बैठक: समसामयिक विषयमा सरकारको ध्यानाकर्षण

काठमाडौँ। राष्ट्रिय सभाको आजको बैठकमा सांसदहरूले विभिन्न समसामयिक विषयमा सरकारको ध्यानाकर्षण गराउनुभएको छ।

बैठकमा सांसदहरूले नेपालको सहमति विना भारत र चीनले लिपुलेक व्यापार सम्झौता गरेको प्रति विरोध जनाउनुहुँदै प्रधानमन्त्री केपी शर्मा ओलीको आसन्न चीन भ्रमणका क्रममा भारतीय र चिनियाँ समकक्षीहरूसँग कूटनीतिक संवाद गर्न आग्रह गर्नुभयो ।

बैठकमा सांसदहरूले विदेशी शिक्षाको नाममा केही कन्सल्टेन्सीहरूले विद्यार्थी पठाउँदा मानव तस्करीको आशङ्का बढेको र विदेशी भूमिमा विद्यार्थी अलपत्र परेको बारे सरकारको ध्यानाकर्षण गराउनुहुँदै उच्चस्तरीय छानबिन समिति गठन गरी दोषीमाथि कारबाही गर्न माग गर्नुभयो ।

यस्तै सांसदहरूले जापानीज एन्सेफेलाइटिस, डेंगु लगायतका सङ्क्रामक रोग नियन्त्रणका लागि प्रभावकारी कदम चाल्न, हैजा महामारी आपत्काल घोषणा गरी निःशुल्क उपचार तथा परीक्षणको व्यवस्था गर्न, आन्दोलनरत उखु किसान तथा कवाड व्यवसायीका माग  छिटो सम्बोधन गर्न तथा महिला स्वास्थ्यकर्मीमाथि भएको यौन दुर्व्यवहारका घटनामा संलग्नमाथि कडा कारबाही गरी पेसागत सुरक्षा र मर्यादित वातावरण सुनिश्चित गर्न सरकारको ध्यानाकर्षण गराउनुभयो ।