ताप्लेजुङ गोल्डकप : सिराहाको सलहेश युवा क्लब फाइनलमा प्रवेश  

ताप्लेजुङ । ताप्लेजुङमा जारी तेस्रो अन्तर्राष्ट्रिय आमन्त्रण ताप्लेजुङ गोल्डकप प्रतियोगितामा सिराहाको सलहेश युवा क्लब फाइनलमा प्रवेश गरेको छ ।

आज सम्पन्न खेलमा झापाको रेड स्टार क्लबलाई २—० गोल अन्तरले पराजित गर्दै सिराहा फाइनलमा प्रदेश गरेको हो । खेल सुरु भएको १३औं र ४८औँ मिनेटमा सिराहाको युसुफ मल्लिकले गरेको गोल नै आजको निर्णायक बन्यो । 

लाखे जात्राको अवसरमा लाखे जात्रा सञ्चालन समितिद्वारा सञ्चालन भइरहेको प्रतियोगितामा साउन ३१ गते शनिवार फाइनल खेल हुने भएको छ । फाइनल खेलमा सिराहा सलहेश क्लब र चर्च ब्वाईज क्लब ललितपुरबीच प्रतिस्पर्धा हुने लाखे जात्रा सञ्चालक समितिका अध्यक्ष सागर मादेनले जानकारी दिनुभयो । 

चर्च ब्वाईजले द योङ ब्रदर्श क्लब सुनसरीलाई ३—१ अन्तरले पराजित गर्दै फाइनलमा प्रवेश गरेको थियो ।  

आजको खेलको ‘म्यानअफ दि म्याच’ सलेहेशका खेलाडी युसुफ मल्लिक भए । मल्लिकले ७ हजार प्राप्त गरे  । 

यस वर्षको गोल्डकप विजेताले नगद ७ लाख २ हजार ८२ र उपविजेताले ३ लाख ५० हजार ८२ रुपियाँ सहित ट्रफी, मेडल र प्रमाणपत्र प्राप्त गर्ने छन् । 

त्यस्तै खेलमा सर्वोत्कृष्ट बन्ने खेलाडीले बाइक समेत प्राप्त गर्ने छ । प्रतियोगितामा भारतका एकसहित नेपालका चार वटा प्रदेशका प्रतिष्ठित क्लबको सहभागिता रहेको थियो ।

ताप्लेजुङमा २०२२ सालदेखि यो प्रतियोगिता हुँदै आएको छ । जिल्लाको ६० वर्ष लामो फुटबल इतिहासमा कहिले लाखे जात्रा हिले फुटबल प्रतियोगिता, कहिले पाथीभर गोल्डकप त कहिले ताप्लेजुङ गोल्डकप रूपमा सञ्चालन हुँदै आएको आयोजकहरूले बताउने गरेका छन् ।