कैलाली कारागार घटना: छानविन समिति गठन

धनगढी। कैलाली जिल्ला कारागार घटनाको छानबिनका लागि सहायक प्रमुख जिल्ला अधिकारीको संयोजकत्वमा पाँच सदस्यीय छानबिन समिति गठन गरिएको छ । 

जिल्ला कारागार भित्र दुई समूहबिच झडप हुँदा धनगढीका भरत चौधरीको मृत्यु भएको छ भने चार दर्जन कैदी बन्दी घाइते भएका छन् ।

 जिल्ला सुरक्षा समितिको बैठकले सहायक प्रमुख जिल्ला अधिकारी किरण जोशीको संयोजकत्वमा पाँच सदस्यीय छानबिन समिति गठन गर्ने निर्णय गरेको कैलालीका प्रमुख जिल्ला अधिकारी गोगन हमालले बताउनुभयो । 

छानबिन समितिलाई १० दिन भित्र कारागारमा भएको सम्पूर्ण घटनाको अध्ययन गरी छानबिन प्रतिवेदन बुझाउन कार्यदिशा दिइएको छ । 

उक्त छानबिन समितिमा जिल्ला प्रहरी कार्यालयका डिएसपी राजकुमार सिंह, सशस्त्र प्रहरीका डिएसपी जनकराज पन्त, अनुसन्धान अधिकृत दीपेन्द्र सिंह र प्रशासकीय अधिकृत शिवराज जोशी सदस्य रहेका छन् । 

धनगढीमा रहेको जिल्ला कारागारमा गए राती दुई समूह बिच झडप भएको थियो । झडपमा परि धनगढीका भरत चौधरीको मृत्यु भएको प्रहरीले जनाएको छ । झडपमा परि घाइते भएका सबैको सेती प्रादेशिक अस्पतालमा उपचार भइरहेको छ । घाइते मध्य केहीको अवस्था गम्भीर रहेको छ । घाइते भएका अधिकांशका हातखुट्टामा भाँचिएका छन् । उपचारमा संलग्न डाक्टर शेरबहादुर कमरले घाइतेहरू खतरामुक्त रहेको बताउनुभयो । घटनामा रड लगायतका समान प्रयोग भएको बताइएको छ । १५० जना क्षमता रहेको कारागारमा ७ सय बढी कैदी बन्दी हेका छन् ।

कारागारको स्थिति नियन्त्रणमा, मानवअधिकार टोली कारागार जाँदै, सुरक्षा व्यवस्था कडा
जिल्ला कारागारको स्थिति नियन्त्रणमा रहेको स्थानीय प्रशासनले जनाएको छ । घटनामा पछि कारागारमा उत्पन्न परिस्थिति सुरक्षाकर्मीको नियन्त्रणमा रहेको प्रमुख जिल्ला अधिकारी गोगन हमालले बताउनुभयो । उहाँले राष्ट्रिय मानव अधिकारको टोलीलाई कारागार भित्र जानका लागि आग्रह गरिएको बताउनु भयो । मानव अधिकारको टोली कारागार जाने तयारीमा रहेको उहाँले जानकारी दिनुभयो । 

यसैबिच घटनापछि जिल्ला कारागारको सुरक्षा व्यवस्था कडा पारिएको छ । यस्तै घाइतेको उपचार भइरहेको सेती प्रादेशिक अस्पतालमा समेत ठुलो सङ्ख्याका सुरक्षाकर्मी परिचालन गरिएको छ ।